ސްކޫލުތަކުގެ ޗުއްޓީއާ ދިމާކޮށް މިދިޔަ ހަފްތާގައި 2،500 އަށް ވުރެ ގިނަ މީހުންނަށް ޕާސްޕޯޓް ހަދައިދީފި އެވެ.
މޯލްޑިވްސް އިމިގްރޭޝަންގެ ޗީފް ޕްރިންސިޕަލް އިމިގްރޭޝަން އޮފިސަރު ފާތިމަތު ލަތީފާ ވިދާޅުވީ ސްކޫލު ތަކުގެ ޗުއްޓީއާ ދިމާކޮށް މިމަހުގެ އެއްވަނަ ދުވަހުން ފެށިގެން މިހާތަނަށް 2،581 މީހަކަށް ޕާސްޕޯޓް ހަދައިދީފައިވާ ކަމަށެވެ.
ފާތިމަތު ލަތީފާ ވިދާޅުވީ އެންމެ ފަހު ވަގުތަށް މަޑުނުކޮށް ދުރާލައި ޕާސްޕޯޓް ހެދުމަށް ކޮންމެ މީހަކުވެސް ސަމާލުކަން ދޭން ޖެހޭ ކަމަށެވެ.
"ޕާސްޕޯޓު މުއްދަތު ހަމަވުމަށް ހަމަސް ދުވަހަށް ވުމުން ވީހާވެސް އަވަހަށް އެކަން ކުރުމަށް އެދެން،" ލަތީފާ ވިދާޅުވި އެވެ.
ޕާސްޕޯޓް ހެދުމަށް ބައެއް ދުވަސްވަރު މާލޭގެ އިމިގްރޭޝަން އޮފީހުގައި ބާރު ބޮޑުވާތީ އެކަން ލުއިފަސޭހު ކުރުމަށް މިހާރު ދަނީ ފިޔަވަޅުތަކެއް އަޅަމުންނެވެ. އެގޮތުން ރާއްޖޭގެ ހުރިހާ އަތޮޅެއްގައި ޕާސްޕޯޓް ހެދޭނެ އިންތިޒާމު ހަމަޖެއްސުމުގެ މަސައްކަތް އިމިގްރޭޝަނުން މިހާރު ވަނީ ފަށާފަ އެވެ.