ރާއްޖޭގައި ފުޅާދާއިރާއެއްގައި ހަށިވިއްކަމުން ދިޔަ ބިދޭސީންތަކެއް އަތުލައިގަނެ ދެ ބިދޭސީއަކު ޑީޕޯޓްކޮށްލައިފި އެވެ.
މޯލްޑިވްސް އިމިގްރޭޝަނުން ސޯޝަލްމީޑިއާގައި ކުރި ޕޯސްޓެއްގައި ބުނީ ރާއްޖޭގައި ފުޅާދާއިރާއެއްގައި ހަށިވިއްކުމުގެ ވިޔަފާރިކުރަމުންދާ ކަމަށް ތުހުމަތުކުރެވޭ ބިދޭސީން ހޯދުމަށް، އެ އިދާރާއާއި ފުލުހުން ގުޅިގެން ހިންގި ހާއްސަ އޮޕަރޭޝަންތަކެއްގައި ބިދޭސީ 04 އަންހެނަކާއި 03 ފިރިހެނަކު އަތުލައިގަނެވިފައިވާ ކަމަށެވެ.
އިމިގްރޭޝަނުން ބުނީ މި މައްސަލަތައް އިތުރަށް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން ދެ އަންހެނަކު މިހާރު ޑީޕޯޓުކޮށްފައިވާ ކަމަށެވެ. ނަމަވެސް އެމީހުން ނިސްބަތްވާ ގައުމެއް ހާމަކޮށްފައެއް ނުވެ އެވެ. އަދި ބާކީ ފަސް ބިދޭސީން ޑިޕޯޓުކުރުމުގެ މަސައްކަތް ކުރަމުންދާ ކަމަށްވެސް ބުންޏެވެ.
ރާއްޖޭގައި ހަށިވިއްކުން ވަރަށް ބޮޑަށް އާންމުވެފައިވާއިރު މި ވިޔަފާރީގައި އުޅޭ ބައެއް ބިދޭސީންނާއި ދިވެހިން އަތުލައިގަނެ ބައެއް ބިދޭސީން މީގެކުރިންވެސް ޑީޕޯޓްކޮށްފައިވެ އެވެ. އަދި މިފަދަ ކުށްތަކުގައި ބައެއް މީހުންނަށް ދައުވާކޮށް ހުކުމްކޮށްފައިވެސް ވެއެވެ.