ރައްޔިތުންގެ މަޖިލީހުގެ މެންބަރުންގެ ތައުލީމީ ފެންވަރެއް ގާނޫނެއްްގައި ލިޔެވިފައި އޮތުން މުހިއްމު ކަމަށް ހުރާ ދާއިރާގެ މެންބަރު ޑރ. އަނާރާ ނައީމު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މެންބަރުންގެ ތައުލީމީ ފެންވަރެއް ހުންނަން ވާނެ ކަމަށް އަނާރާ ވިދާޅުވީ ރައްޔިތުންގެ މަޖިލީހުގެ މެންބަރުންގެ އަދަދު ކޮންމެ ފަސް އަހަރަކުން އިތުރުވަމުންދާ ދިއުމާ މެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ރައްޔިތުންގެ މަޖިލީހަށް ހުށަހަޅާފައިވާ ގަރާރުގެ އިބްތިދާއީ ބަހުސްގައި އަންގާރަ ދުވަހު ވާހަކަ ދައްކަވަމުންނެވެ.
އަނާރާ ވިދާޅުވީ، ރާއްޖޭގެ އާބާދީގެ ބޮޑު ބަޔަކީ މިއަދު ތައުލީމީ ބައެއް ކަމުގައިވާތީ މަޖިލީހުގެ މެންބަރުންގެ ތައުލީމީ ފެންވަރެއް ހުންނަން ވާނެ ކަމަށެވެ. އެގޮތުން އަނާރާ ވިދާޅުވި ގޮތުގައި މަޖިލީހުގެ މެންބަރުގެ ތައުލީމީ ވަކި ޝަރުތެއް އޮތުމާ ގުޅޭ ބަހުސަކީ މިހާރު ކުރަންޖެހޭ ބަހުސެކެވެ.
ރައްޔިތުންގެ މަޖިލީހުގެ މެންބަރުންގެ ތައުލީމީ ވަކި ޝަރުތެއް ހުރުމަކަށް ގާނޫނުއަސާސީ މިހާރު ލާޒިމެއް ނުކުރެ އެވެ. އެހެންނަމަވެސް މަޖިލީހުގެ މެންބަރުންގެ ވަކި ޝަރުތުތަކެއް ހުރުމަށް ރައްޔިތުންގެ ތެރެއިން ބައެއް މީހުން އަބަދުވެސް ވަކާލާތު ކުރެ އެވެ.
އަނާރާ ނައީމަކީ 20 ވަނަ ރައްޔިތުންގެ މަޖިލީހުގައި ތިއްބެވި މެންބަރުންގެ ތެރެއިން ޕީއެޗްޑީ އޮތް ހަމައެކަނި މެންބަރެވެ. އޭނާ ވަނީ 18 ވަނަ ރައްޔިތުންގެ މަޖިލީހުގައި މަކުނުދޫ ދާއިރާގެ މެންބަރު ކަންވެސް ކުރައްވާފަ އެވެ.