މެންދުރު ނަމާދަށް މަޖިލިސް މެދުކަނޑާލަން ގަވާއިދުގައި ހިމަނައިފި

މެންދުރު ނަމާދުގެ ވަގުތަށް މަޖިލީހުގެ ޖަލްސާތައް މެދުކަނޑާލަން ޖެހޭ ގޮތަށް މަޖިލީހުގެ ގަވާއިދުގައި ހިމަނައިފި އެވެ.

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ރައްޔިތުންގެ މަޖިލީހުގެ ޖަލްސާތައް މެންދުރު ނަމާދާ ދިމާކޮށް މެންދުރު 12:00 އިން މެންދުރުފަހު 1:00 އަށް ޖަލްސާ މެދުކަނޑާލުމަށް މިހާރު ގަވާއިދުގައި ހިމަނާފައިވާ ކަމަށެވެ.

މީގެ ކުރިން ނަމާދުގެ ވަގުތަށް ޖަލްސާ މެދުކަނޑާލަނީ މެންދުރު 12:30 އިން މެންދުރު ފަހު 1:00 އަށެވެ.

މަޖިލީހުގެ ރައީސް އަބްދުއްރަހީމް މީގެ ކުރިން ވަނީ މެންދުރު ނަމާދު ވަގުތަށް މަޖިލީހުގެ ޖަލްސާތައް މެދުކަނޑާނުލެވޭތީ އެ ވަގުތާ ދިމާކޮށް މަޖިލީހުގެ ތަޅުމުގައި ބަންގީގެ އަޑުވެސް އިއްވާފަ އެވެ.

ރައްޔިތުންގެ މަޖިލީހުގައި ނަމާދު ގަޑިއަށް ހާއްސަ އިސްކަމެއް ދީގެން މިގޮތަށް ގަވައިދު އިސްލާހުކުރި މިއީ ފުރަތަމަ ފަހަރެވެ.