ހިއުމަން ޓްރެފިކިން ނުވަތަ އިންސާނީ ވަގުފާރި ކުރާ މީހުންނާ ގުޅޭ މައްސަލަތަކާއި އެ ކުށުގެ ޝިކާރައަކަށްވާ މީހުންގެ މައްސަލަތަކުގެ ތަހުގީގާއި ޝަރީއަތްތައް ލަސްވާތީ ހޯމްލޭންޑް ސެކިއުރިޓީ މިނިސްޓަރު އަލީ އިހްސާން ކަންބޮޑުވުން ފާޅުކުރައްވައިފި އެވެ.
ބައިނަލްއަގްވާމީ އިންސާނީ ވަގުފާރިއާ ދެކޮޅަށް މަސައްކަތްކުރާ ދުވަސް ފާހަގަކުރުމަށް މިއަދު ބޭއްވި ރަސްމިއްޔާތުގައި މިނިސްޓަރު އިހްސާން ވިދާޅުވީ
ތަފާސްހިސާބުތަކުން ފެންނަ ގޮތުގައި އިންސާނީ ވަގުފާރީގެ ޝިކާރައަކަށްވާ ކޮންމެ ތިން މީހެއްގެ ތެރެއިން އެކަކަކީ ކުޑަކުއްޖެއް ކަމަށެވެ. މިފަދަ ކުށް ކުރާ މީހުން ކުޑަކުދިން އެޑޮޕްޓްކޮށް އެ ކުދިންގެ ހައްގުތައް ނިގުޅައިގަނެ ޖިންސީ ގޯނާކުރަމުންދާ ކަމަށެވެ.
އިހްސާން ވިދާޅުވީ ހިއުމަންޓް ޓްރެފިކިން އަކީ މިޒަމާނުގައި އިންސާނުން އަޅުވެތިކުރާ ގޮތް ކަމަށާއި އެއީ ނުރައްކާތެރި ކުށަކަށް ވާތީ އެކަން ހުއްޓުވަންޖެހޭ ކަމަށެވެ. އެހެންވެ މި ކުށް ހުއްޓުވުމަށްޓަކައި މިކަމާ ދެކޮޅަށް މަސައްކަތް ކުރާނެ މީހުން ބިނާކުރުމާއި، އާންމުން ހޭލުންތެރިކުރުވުމާއި، ކުށުގެ ޝިކާރައަށްވާ މީހުންނަށް ރައްކާތެރިކަން ކަށަވަރުކުރުމާއި، ކުށް ރިޕޯޓުކުރެވޭނެ ފޯން ލައިނެއް ގާއިމުކުރަންޖެހޭ ކަމަށްވެސް ވިދާޅުވި އެވެ.
މިރަސްމިއްޔާތުގައި ވަނީ އިންސާނީ ވަގުފާރި ހިންގާ މީހުންގެ މައްސަލަތައް ރިޕޯޓްކުރުމަށް ހާއްސަ ފޯން ލައިނެއް ތައާރަފްކޮށްފަ އެވެ. އެގޮތުން ގާއިމުކުރި ފޯން ނަންބަރަކީ 9193939 އެވެ.
އިހްސާން ވިދާޅުވީ ހިއުމަން ޓްރެފިކިންގެ ވިޔަފާރީގައި އުޅޭ މީހުންނާއި އެމީހުންގެ ސަބަބުން ޝިކާރައަކަށްވާ މީހުންގެ މައްސަލަތަކުގެ ދައުވާކުރުމުގެ މަރުހަލާއާއި ޝަރީއަތުގެ މަރުހަލާތައް އަވަސްކުރެވޭނެ ގޮތްތައް ހޯދައި ބަލަމުންދާ ކަމަށެވެ. މިފަދަ ކުށެއްގެ ޝިކާރައަކަށް އެއްވެސް މީހަކު ހުށަހެޅިގެން ދިއުމަކީ ބިރެއް ކަމަށް ފާހަގަކުރައްވަމުން އިހްސާން ވިދާޅުވީ މިމައްސަލައަށް ގާނޫނީ ގޮތުން ހޯދޭނެ ހައްލުތަކެއް ބަލައި ކަމާ ގުޅޭ ގާނޫނުތައް އިސްލާހުކުރާނެ ކަމަށެވެ.
"ތަހުގީގުތަކާއި ޝަރީއަތްތައް އަވަސްކުރަން ސަރުކާރުން ހާއްސަ އިސްކަމެއް އެބަދޭ،" އިހްސާން ވިދާޅުވި އެވެ.
ބައިނަލްއަގްވާމީ އިންސާނީ ވަގުފާރިއާ ދެކޮޅަށް މަސައްކަތްކުރާ ދުވަހުގެ ގޮތުގައި ފާހަގަކުރަނީ ޖުލައި 30 ވަނަ ދުވަހެވެ. މިދުވަހުގެ މިއަހަރުގެ ޝިއާރަކީ "މީހުން އިންސާނީ ވަގުފާރިކުރުން ހުއްޓުވުމަށް ކުރާ މަސައްކަތުގައި އެއްވެސް ކުޑަކުއްޖަކު އިސްތިސްނާ ނުކުރުން" މިއެވެ.