އެމްޑީޕީގެ ސޯޝަލްމީޑިއާ އެކްޓިވިސްޓް ހުސައިން ޝާފިއު (ތުއްތު) އެކްސްގައި ކުރި ޕޯސްޓަކާ ގުޅިގެން ފުލުހަށް ހާޒިރުވާން އަންގައިފި އެވެ.
ޝާފިއުއަށް ފުލުހަށް ހާޒިރުވާން އަންގާފައި އޮތީ މާދަމާ މެންދުރުފަހު 1:30 ގައެވެ.
ޝާފިއު މި މަހުގެ އަށްވަނަ ދުވަހު އެކްސްގައި ކުރި ޕޯސްޓްގައި ނުރުހުން ފާޅުކޮށްފައިވަނީ މިސަރުކާރުން ސިނގިރޭޓާ ދެކޮޅަށް އަޅަމުންދާ ފިޔަވަޅުތަކާ ގުޅިގެން ސިނގިރެޓް އަގުބޮޑުވުމާ ގުޅިގެންނެވެ. ޝާފިއުގެ ޕޯސްޓު ނިންމާލަމުން "މަށަށް ކަލޭ މަގެއް މަތިން ނުފެންނާތި" ކަމަށް ބުނެފައިވެ އެވެ.
މިކަމާ ގުޅިގެން އެމްޑީޕީގެ ޗެއާޕާސަން ފައްޔާޒު އިސްމާއީލް ވަނީ ސަރުކާރަށް ވަރަށް ބޮޑަށް ފާޑުވިދާޅުވެ ޝާފިއުގެ ދިފާއުގައި ވާހަކަދައްކަވާފަ އެވެ.
"ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ 'އަބުރުފުޅު'ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފި. ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ،" އެކްސްގައި ކުރެއްވި ޕޯސްޓެއްގައި ފައްޔާޒު ވިދާޅުވި އެވެ.
އޭނާ ވިދާޅުވީ ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަމަށެވެ. ނަމަވެސް ހިޔާލާއި ފިކުރުގައި ތަޅު ނޭޅުވޭނެ ކަމުގައިވެސް ވިދާޅުވި އެވެ.
"މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" ފައްޔާޒު ވިދާޅުވި އެވެ.
ފައްޔާޒުގެ ޕޯސްޓަށް ރައްދު ދެމުން ހޯމްލޭންޑް މިނިސްޓަރު އަލީ އިހްސާން ވަނީ ޝާފިއު ފުލުހަށް ހާޒިރުކުރަން ނިންމި ސަބަބު ސާފު ކޮށްދެއްވާފަ އެވެ. އެގޮތުން މިނިސްޓަރު ވިދާޅުވީ ޝާފިއުގެ ޕޯސްޓުގައި "މަށަށް ކަލޭ މަގެއް މަތިން ނުފެންނާތި"އޭ ބުނެފައިވަނީ ކޮންމެވެސް މީހަކަށް ނިސްބަތްކޮށް އެމީހަކު މަގެއްގެ މަތިން ފެނިއްޖެނަމަ އެމީހަކަށް ޖިސްމާނީ ގޮތުން ގެއްލުމެއް ދީފާނެ ކަމަށް ދޭހަވާ ގޮތަށް ކަަމަށެވެ.
"[އެހެން] އޮތުމުން އެކަމުގެ ތަފްސީލް ހޯދައި މިކަން ސާފުކުރުމަކީ ކަމާބެހޭ އިދާރާތަކުން ކޮންމެހެން ކުރަންޖެހޭ ކަމެއް،" މިނިސްޓަރު ވިދާޅުވި އެވެ.
އިހްސާން ވަނީ މާދަމާ އެހެން މީހަކު އެފަދަ އިބާރާތެއް ފައްޔާޒަށް ނިސްބަތްކޮށް ނުވަތަ ދޭހަވާ ގޮތަށް ބުނެފިނަމަ އެއީ ހިޔާލުފާޅުކުރީ ކަމަށް ބަލައި އަޅާނުލާ ތިބެންވީތޯއޭ ވިދާޅުވެ ސުވާލުވެސް ކުރައްވާފަ އެވެ.
"އަދި އެހެން ތިއްބާ މަނިކުފާނު މަގެއްމަތިން ފެނި ޖިސްމާނީ އަނިޔާއެއް ދީފިނަމަ އެއީ ފާޅުކުރި ހިޔާލު އިތުރަށް ސާފުކޮށްދިނީ ކަމަށް ބަލާ އަޅާނުލާ ތިބެންވީތޯ؟ މިއީތޯ މަނިކުފާނުގެ ޒައާމަތެއްގައި މިގައުމުގައި ކަންކަން އޮންނާނެ ގޮތަކީ؟" އިހްސާން ސުވާލު އުފެއްދެވި އެވެ.
އިހްސާން ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުގައި އެއްވެސް މީހަކު އިސްތިސްނާ ނުކޮށް އެމީހެއްގެ ހަށިގަނޑާއި ފުރާނަ ރައްކާތެރިކުރެވޭނެ ހުރިހާ ފިޔަވަޅެއް އަޅާނެ ކަމުގެ ޔަގީންކަން ދެއްވާ ކަމަށެވެ. ހަމައެއާއެކު ރާއްޖޭގެ ގާނޫނުތަކާއި ގަވާއިދުތަކުގެ އިމުގެ ތެރޭގައި ހިޔާލުފާޅުކުރެވޭނެ އެންމެ ފުޅާމިނަށް އެކަން ކުރެވޭނެ މަގު އޮންނާނީ އަބަދުވެސް ހުޅުވިފައި ކަމަށްވެސް ވިދާޅުވި އެވެ.
"ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ވަރަށް ޣައިރު ޒިންމާދާރު ކަމެއް،" އިހްސާން ވިދާޅުވި އެވެ.