ހުޅަނގު ގައުމުތަކުން އަންބާކިޔާފައި ޔުކްރޭނަށް ކިތަންމެ ވަރަކަށް ފައިޓަރު ޖެޓު ފޮނުވި ނަމަވެސް ޖެޓުތައް ބިމަށް ވައްޓާލުން ރަޝިއާގެ އަސްކަރިއްޔާއަށް ވާނީ ދާދި ފަސޭހަ ކަމަކަށް ކަމަށް ރިޔާސީ ގަނޑުވަރު ކްރެމްލިންއިން ބުނެފި އެވެ.
ޔުކްރޭނާށް ފުރަތަމަ ބުރުގައި ހުޅަނގުން ފޮނުވާފައިވަނީ އެފް16ގެ ހަ ފައިޓަރު ޖެޓެވެ. އަދި އިތުރު ފައިޓަރު ޖެޓުތައް ފޮނުވަން ހުޅަނގުން އޮތީ ވައުދުވެފަ އެވެ.
އެފް16ގެ މަތިންދާބޯޓުތައް ގަންނަން ބޭނުންވާ ފައިސާ ހޯދާނެ ގޮތަކާ މެދު ހުޅަނގުގެ ގައުމުތަކުގެ މެދުގައި ނުތަނަވަސްކަމާއި ހިޔާލު ތަފާތުވުން އޮތީ އުފެދިފަ އެވެ. ވަކި ގައުމަކަށް މާގިނައިން ފައިސާ ދޭން ޖެހުން މިހާރު އޮތީ އަރާރުމަކަށް ބަދަލުވެފަ އެވެ.
ޔޫރަޕްގެ އިއްތިހާދުން ބުނާ ގޮތުން ޔުކްރޭނަށް ފައިޓަރު ޖެޓުތައް ފޮނުވަނީ އެ ގައުމުގެ އަސްކަރިއްޔާއަށް ވެދޭ އެހީއެއް ގޮތުގަ އެވެ. އެއީ ޔުކްރޭންގެ އަސްކަރިއްޔާ މާބޮޑަށް އަނަރޫފަވެ ބަލިކަށިވުމުގެ ސަބަބުން ކޮށްދޭ ކަމެއް ކަމަށްވެސް އޮތީ ބުނެފަ އެވެ.
އެމެރިކާ އާއި ލިތުއޭނިއާ މެދުވެރިކޮށް ޔުކްރޭނަށް ފޮނުވި ފައިޓަރު ޖެޓުތަކުގައި ޒަމާނީ ޓެކްނޮލޮޖީ ހުންނާނެ ކަމަށް ޔޫރަޕުން ބުނެ އެވެ.
ޔުކްރޭނަށް ފޮނުވި މޮޑެލް އަކީ ރޮކެޓާއި ބޮމާއި އަދި މިސައިލް އުފުލޭ ވަރުގެ ކުޅަދާނަ ބޯޓެވެ. އަދި މި ބޯޓުތަކުގައި އުންޑަ ދުރަށް ފޮނުވާ ބާވަތުގެ ބަޑި ހަރުކޮށްފައި ހުންނަ ކަމަށް ވެސް ރިޕޯޓްތައް ބުނެ އެވެ.
ހުޅަނގުގެ ގައުމުތަކުން ރާވާފައި އޮތް ގޮތަށް ކަންތައްތައްތައް ކުރިއަށްދާނަމަ ޑެންމާކުން 19 ފައިޓަރު ޖެޓު ޔުކްރޭނަށް ދޭނެ އެވެ. ނެދަލޭންޑްއިން 24 އަދި ނޯވޭއިން ހަ ޖެޓު ފޮނުވާނެ ކަމަށް ވަނީ ބުނެފަ އެވެ.
އަސްކަރީ ތަރުޖިބާކާރުން ދެކޭ ގޮތުގައި ޔުކްރޭނަށް ފައިޓަރު ޖެޓު ފޮނުވުމަކުން ލިބޭނެ ވަކި މޮޅެއް ނޯންނާނެ އެވެ. ރަޝިއާ އަކީ ވަރަށް ތަޖުރިބާ ހުރި ގައުމެއްކަން ދުނިޔެ ދަންނަން ޖެހޭ ކަމަށްވެސް ތަޖުރިބާކާރުން ބުނެ އެވެ.
ޔުކްރޭންގެ ފައިޓަރު ޖެޓުތައް ހަލާކުކޮށްލުން ރަޝިއާއަށް ވާނީ ފަރިތަ ކަމަކަށް ކަމަށްވެސް އަސްކަރީ މާހިރުން ބުނެ އެވެ.