އުރީދޫ މޯލްޑިވްސްއަށް މި އަހަރުގެ ދެވަނަ ކުއާޓަރުގައި އާމްދަނީގެ ގޮތުގައި 540.7 މިލިއަން ރުފިޔާ ލިބިއްޖެ އެވެ.
އުރީދޫ މޯލްޑިވްސް އިން އާންމުކޮށްފައިވާ މިއަހަރުގެ ދެވަނަ ކުއާޓަރުގެ މާލީ ހިސާބުތައް ދައްކާ ގޮތުންް އެ ކުއާޓަރުގައި އެ ކުންފުންޏަށް ލިބުނު އާމްދަނީގެ ތެރެއިން 415.2 މިލިއަން ރުފިޔާއަކީ މޯބައިލް ހިދުމަތްތަކުން ލިބުނު އާމްދަނީ އެވެ.
ފިކްސްޑް، ބްރޯޑްބޭންޑް އެންޑް އެންޓަޕްރައިސް ހިދުމަތްތަކުން 125.2 މިލިއަން ރުފިޔާގެ އާމްދަނީއެއް ލިބުނުއިރު އެހެނިހެން ހިދުމަތްތަކުން 238،000 ރުފިޔާގެ އާމްދަނީއެއް ލިބުނެވެ.
ޓެކުހަށް ކެނޑުމަށްފަހު މި އަހަރުގެ ދެވަނަ ކުއާޓަރުގައި އުރީދޫއަށް ވަނީ 173.7 މިލިއަން ރުފިޔާ ފައިދާވެފަ އެވެ. ޓެކުހަށް ކެނޑުމުގެ ކުރިން މި އަދަދު ހުރީ 196.9 މިލިއަން ރުފިޔާގަ އެވެ.
އުރީދޫއަށް މި އަހަރުގެ ފުރަތަމަ ކުއާޓަރުގައި އާމްދަނީގެ ގޮތުގައި 554 މިލިއަން ރުފިޔާ ލިބުނެވެ.
މި އަދަދާއެކު އަހަރުގެ ފުރަތަމަ ހަ މަސް ދުވަހުގެ ތެރޭގައި އުރީދޫއަށް އާމްދަނީގެ ގޮތުގައި އެއް ބިލިއަން ރުފިޔާ ވަނީ ލިބިފަ އެވެ.