މާލީ އިދާރާތަކުގެ ބޯޑުތަކަށް ސިޔާސީ ބޭފުޅުން އައްޔަންކުރެވޭ ގޮތަށް ކޯޕަރޭޓް ގަވާނެންސް ގަވާއިދަށް ގެނައި އިސްލާހާ ގުޅޭ މައްސަލަ މާލިއްޔަތު ކޮމިޓީއަށް ނުބެލޭނެ ކަމަށް ނިންމާ އެ ކޮމިޓީން މައްސަލަ ބޭރުކޮށްފި އެވެ.
މިމައްސަލަ މާލިއްޔަތު ކޮމިޓީއަށް ހުށަހެޅީ މޯލްޑިވްސް ފައިނޭންޝަލް ސާވިސް އެސޯސިއޭޝަނުންނެވެ.
މާލިއްޔަތު ކޮމިޓީގެ މިއަދުގެ ބައްދަލުވުމަށް މިމައްސަލަ ބެލުމަށް އެޖެންޑާކޮށް ކޮމިޓީ ފެށުމާ އެކު ޕީއެންސީގެ ކެލާ ދާއިރާގެ މެންބަރު އަބްދުﷲ ޝަރީފް ވިދާޅުވީ އެއީ މާލިއްޔަތު ކޮމިޓީއަށް ބެލޭނެ މައްސަލައެއް ނޫން ކަމަށެވެ. އެހެންވެ އޭނާ ހުށަހެޅުއްވީ އެއީ މާލިއްޔަތު ކޮމިޓީއަށް ނުބެލޭނެ މައްސަލައެއް ކަމަށް ކަނޑައެޅުމަށެވެ. މި ހުށަހެޅުއްވުމަށް ޕީއެންސީގެ ފުނަދޫ ދާއިރާގެ މެންބަރު މުހައްމަދު މަމްދޫހް ތާއީދު ކުރެއްވި އެވެ.
ނަމަވެސް ކޮމިޓީގައި ތިއްބެވި އެމްޑީޕީގެ ދެ މެންބަރުން ކަމަށްވާ ހުޅުމާލެ ދެކުނު ދާއިރާގެ މެންބަރު ޑރ. އަހްމަދު ޝަމްހީދާއި ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާ (ގަޕޯ) ވިދާޅުވީ އެއީ މާލީ ދާއިރާއާ ގުޅޭ މައްސަލައަކަށް ވާތީ އެ މައްސަލަ ކޮމިޓީއަށް ބެލޭނެ ކަމަށެވެ. އަދި ޝަމްހީދު ވަނީ މާލިއްޔަތު ކޮމިޓީން އެ މައްސަލަ ބެލުމަށް ހުށަހަޅުއްވާފަ އެވެ. އެ ހުށަހެޅުއްވުމަށް ޣަފޫރު ތާއީދު ކުރެއްވި އެވެ.
ޑރ. ޝަމްހީދު ވިދާޅުވީ ގަވައިދަށް ގެނައި ބަދަލާ އެކު ފިނޭންސް މިނިސްޓްރީގައި ތިއްބެވި ސިޔާސީ ބޭފުޅުންނަށްވެސް މާލީ އިދާރާތަކުގެ ބޯޑުތަކުގައި ބައިވެރިވެވި އެފަދަ ތަންތަނުގެ ނިންމުމަށް ބާރު ފޯރުވޭނެ ކަމަށެވެ.
ޣަފޫރު ވިދާޅުވީ މާލީ އިދާރާތައް ވަކިން ހާއްސަކޮށް މަރުކަޒީ ބޭންކް -- އެމްއެމްއޭ ހިންގަންވާނީ ސިޔާސީ ކަންކަން އެއް ފަރާތްކޮށް މިނިވަންކޮށް ކަމަށެވެ.
ހުށަހެޅުމެއް ހުށަހަޅައި ތާއީދު ލިބިފައި ވަނިކޮށް ކޮމިޓީގެ މުގައްރިރު ގާސިމް އިބްރާހީމް އެ ކޮމިޓީގައި ބަހުސް ކުރެއްވުމަށް ފުރުސަތު ދެއްވައިގެން އިންނެވުމުން ޕީއެންސީގެ ހިތަދޫ މެދު ދާއިރާގެ މެންބަރު އަހްމަދު އަޒާން ވަނީ ތާއީދު އޮތް ހުށަހެޅުމެއް އޮތުމުން އެ ހުށަހެޅުމަށް ވޯޓަށް ނާހައި ބަހުސް ނުކުރެވޭނެ ކަމަށް ވިދާޅުވެފަ އެވެ.
އެހެންވެ ގާސިމް ވަނީ އަބްދުﷲ ޝަރީފާއި ޝަމްހީދުގެ ހުށަހެޅުއްވުމަށް ވޯޓަށް އައްސަވާފަ އެވެ. ވޯޓުން ފާސްވީ ޝަރީފް ހުށަހެޅުއްވި ގޮތަށް މާލިއްޔަތު ކޮމިޓީން އެ މައްސަލަ ނުބެލުމަށެވެ. އަދި ގާސިމް ވަނީ އެ މައްސަލަ މަޖިލީހުގެ ގަވައިދު ކޮމިޓީއަށް ފޮނުވުމަށް ނިންމަވާފަ އެވެ.