އިތުރު ފަސް ރަށެއްގައި އައިސް ޕްލާންޓް އަޅާނެ ބަޔަކު ހޯދަނީ

ފަސް ރަށެއްގައި އައިސް ޕްލާންޓް އަޅާނެ ބަޔަކު ހޯދުމަށް ފިނޭންސް މިނިސްޓްރީން އިއުލާނުކޮށްފި އެވެ.

އައިސް ޕްލާންޓް އަޅަން ނިންމާފައިވަނީ ހއ. އިހަވަންދޫއާއި، ހއ. ދިއްދޫ އާއި، ށ. ކޮމަންޑޫއާއި، އއ. ރަސްދޫގެ އިތުރުން ގދ. ރަތަފަންދޫ ގައެވެ.

ސައުދީ ފަންޑްގެ އެހީގައި މިއިން ކޮންމެ ރަށެއްގައި އަޅަން ނިންމާފައިވަނީ 50 ޓަނުގެ އައިސް ޕްލާންޓެވެ.

އައިސް ޕްލާންޓްތައް އެޅުމަށް ޝައުގުވެރިވާ ފަރާތްތައް ހޯދަނީ އިންޓަނޭޝަނަލް ބިޑިން އުސޫލުންނެވެ.

މިމަސައްކަތަށް ބީލަން ހުށަހަޅާ ފަރާތްތަކުގެ އަތުން އަނބުރާ ނުލިބޭ ގޮތަށް ރަޖިސްޓްރޭޝަން ފީއެއް ނަގާއިރު ބިޑް ސެކިއުރިޓީގެ ގޮތުގައި 250،000 ރުފިޔާ ހުށަހަޅަންޖެހެ އެވެ.

ބީލަން ހުށަހެޅުމަށް ފުރުސަތު ހުޅުވާލާފައިވަނީ ކުރިއަށް އޮތް ސެޕްޓެމްބަރު މަހުގެ 20 ވަނަ ދުވަހުގެ ނިޔަލަށެވެ.

ސައުދީ ފަންޑުގެ އެހީގައި މިހާރުވެސް 11 ރަށެއްގައި ދަނީ އައިސް ޕްލާންޓް ހަދަމުންނެވެ. އަދި ރާއްޖެގެ އެކި ހިސާބުތަކުގައި މިހާރު ވެސް 25 އައިސް ޕްލާންޓަކުން ހިދުމަތް ދެއެވެ.