މުރައިދޫގޭގެ ޑިރެކްޓާ ޖެނެރަލްގެ މަގާމަށް ދަގަނޑޭ

ރައްޔިތުންގެ މަޖިލީހުގެ ރައީސް ދިރިއުޅުއްވާ ގެކޮޅު -- މުރައިދޫގޭގެ ޑިރެކްޓާ ޖެނެރަލްގެ މަގާމަށް އަލީ އަޝްފާގް (ދަގަނޑޭ) ހަމަޖައްސައިފި އެވެ.

"އަވަސް" އަށް އެނގިފައިވާ ގޮތުން ދަގަނޑޭ އެ މަގާމަށް އައްޔަންކުރީ މިދިޔަ ޖުލައި މަހު އެވެ.

ޑިރެކްޓާ ޖެނެރަލްގެ ހައިސިއްޔަތުން މުރައިދޫގޭގައި ދަގަނޑޭގެ މައިގަނޑު ޒިންމާތަކުގެ ގޮތުގައި އޮންނާނީ އިދާރީ ހިންގުމާއި ޕްރޮޓޮކޯލްގެ ކަންކަން ކަމަށް ބެލެވެ އެވެ.

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ދިރިއުޅުއްވާ މުރައިދޫގޭގެ ޑިރެކްޓާ ޖެނެރަލްގެ މަގާމަށް ދަގަނޑޭ ހަމަޖެއްސިއިރު އަބްދުއްރަހީމްގެ ދަރިކަލުން އަދި ޓޫރިޒަމް މިނިސްޓަރު އިބްރާހީމް ފައިސަލްއާއެކު ބައެއް ހަފުލާތަކުން ދަގަނޑޭ ފެނެ އެވެ.

ދަގަނޑޭއަކީ ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އެވެ.

ރާއްޖެއިން 2008 ވަނަ އަހަރު ސާފް ޗެމްޕިއަންޝިޕް ކާމިޔާބުއިރު އެ ޓީމްގައި ހިމެނުނު ދަގަނޑޭ ވަނީ ރާއްޖޭގެ ކްލަބުތަކުގެ އިތުރުން މެލޭޝިއާގެ ޕީޑީއާރްއެމް އަށްވެސް ކުޅެފަ އެވެ.

އަލީ އަޝްފާގު މި މަގާމަށް އައްޔަންކޮށްފައިވާއިރު މޯލްޑިވްސް އިމިގްރޭޝަންގެ ޑެޕިއުޓީ ކޮންޓްރޯލާގެ މަގާމުގައި ހުންނެވީ ދަގަނޑޭގެ ބޭބެ -- އަހްމަދު އަޝްފާން އެވެ.

ރައްޔިތުންގެ މަޖިލީހުގެ ރައީސް ދިރިއުޅުއްވުމަށް ދައުލަތުން ހާއްސަ ގެކޮޅެއް ހަމަޖެއްސީ ކުރިން އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދަށް މެއި 6، 2021 ގައި ދިން ބޮމުގެ ހަމަލާއަށްފަހު ސަލާމަތީ ގޮތުން އެޅުއްވި ފިޔަވަޅެއްގެ ގޮތުގައެވެ.