ފަަލަސްތީނުގެ ރައީސް ޑރ. މަހްމޫދު އައްބާސްއާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްދަލުކުރައްވައިފި އެވެ.
ފަލަސްތީނުގެ ރައީސްއާއި ރައީސުލްޖުމްހޫރިއްޔާ ބައްދަލުކުރެެއްވީ އދގެ އާންމު މަޖިލީހުގައި ބައިވެރިވެވަޑައިގަތުމަށް އެމެރިކާއަށް ކުރައްވާ ދަތުރުފުޅުގެ ތެރެއިންނެވެ.
މި ބައްދަލުކުރެއްވުމުގައި ފަަލސްތީނުގެ ރައީސް ވަނީ އެ ގައުމުގައި ހިންގަމުންދާ ގަތުލުއާންމު ހުއްޓުވުމަށް ބައިނަލްއަގްވާމީ މުޖުތަމައަށް ގޮވާލައްވާފަ އެވެ. އަދި ފަލަސްތީނުގެ ރައްޔިތުންނަކީވެސް އާންމު އިންސާނުން ކަމުން އެ ގައުމުގެ ރައްޔިތުންނަށް ބޭނުންވާ އެހީތެރިކަމަށްވެސް ޑރ. މަހްމޫދު އައްބާސް ވަނީ ރައީސް މުއިއްޒުގެ ކިބައިން އެދިވަޑައިގެންފަ އެވެ.
ފަަލަސްތީނުގެ ރައީސް ވަނީ ރާއްޖެއިން ފަަލަސްތީނަށް ދެމުންދާ އެހީތެރިކަމަށާއި ފަސްނުޖެހި ދެމުންދާ އެއްބާރުލުމަށް ޝުކުރުއަދާކުރައްވާ އެވެ.
ރައީސުލްޖުމްހޫރިއްޔާ ވަނީ ރާއްޖެއިން ފަލަސްތީނަށް ދެވެން އޮތް އެންމެހާ އެހީތެރިކަމެއް ފޯރުކޮށްދެއްވާނެ ކަމުގެ އިތުރު ޔަގީންކަން ވެސް ދެއްވާފަ އެވެ.
ފަަލަސްތީނުގެ ރައީސްއާ ބައްދަލުކުރެއްވުމަށްފަހު ރައީސް މުއިއްޒު ވިދާޅުވީ ރާއްޖޭގެ ކޮންމެ ރައްޔިތެެއްވެސް ހުންނާނީ ފަލަސްތީނާއެކު ކަމަށެވެ.
ރައީސް ވަނީ ފަލަސްތީނުގެ ރައްޔިތުންނަށް ދެމުން އަންނަ ހަމަލާތައް ކުށްވެރިކުރައްވާ، ހުއްޓުމެއް ނެތި ދެމުން އަންނަ ފުރިހަމަ އެއްބާރުލުން ކުރިއަށް އޮތް ތަނުގައިވެސް ދެއްވާނެ ކަމުގެ ޔަގީންކަން ދެއްވާފަ އެވެ.
މީގެއިތުރުން ފަަލަސްތީނަކީ މިނިވަން ދައުލަތަކަށް ހެދުމަށްޓަކައި ބައިނަލްއަގްވާމީ ގޮތުން ކުރެވެން ހުރި އެންމެހާ މަސައްކަތްތައް ކުރައްވާނެ ކަމުގައިވެސް ރައީސް ވިދާޅުވި އެވެ.
ރައީސް މުއިއްޒުގެ ސަރުކާރުން ވަނީ ފަލަސްތީނުގެ ރައްޔިތުންނަށް ދިވެހި ދައުލަތުން ދެމުންދާ އެހީތެރިކަން އިތުރުކުރުމަށްވެސް ނިންމަވާފަ އެވެ. އަދި ފަލަސްތީނަށް އެހީވުމުގެ ގޮތުން މިސަރުކާރުން ކުރިއަށް ގެންދިޔަ ޓެލެތޯނުން ލިބުނު 19 މިލިއަނަށް ވުރެ ގިނަ ރުފިޔާ ވެސް ވަނީ އަންރުވާ އެކައުންޓަށް ފޮނުވާފަ އެވެ.
އެހީގެ ގޮތުގައި ފަލަސްތީނުގެ ރައްޔިތުންނަށް ދިވެހި ސަރުކާރުން ވަނީ 7،800 މަސްދަޅު ކޭސް ހަދިޔާކުރުމަށް ނިންމާފަ އެވެ.