މި އަހަރުގެ މިހާތަނަށް އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސެކިއުޓާ ޖެނެރަލް އޮފީހަށް 85 މައްސަލައެއް ފޮނުވާފައިވާ ކަމަށް އެ އޮފީހުން ބުނެފި އެވެ.
ޕީޖީ އޮފީހުން ބުނީ އެ އޮފީހަށް ދެވަނައަށް އެންމެ ގިނަ މައްސަލަ ހުށަހަޅަނީވެސް އޭސީސީ އިން ކަމަށެވެ.
ޕީޖީން ބުނީ މި އަހަރުގެ މިހާތަނަށް ތަހުގީގަށްފަހު ޖުމްލަ 85 މައްސަލައެއް އޭސީސީން ހުށަހަޅާފައިވާއިރު މި މަހުގެ މިހާތަނަށް އެކަނިވެސް 11 މައްސަލއެއް ހުށަހަޅާފައިވާ ކަމަށެވެ.
މީގެތެރެއިން ދައުވާކުރުމަށް ކޯޓަށް ހުށަހަޅާފައިވަނީ ފަސް މައްސަލަ ކަމަށްވެސް ޕީޖީ އޮފީހުން ބުނެ އެވެ.
އޭސީސީގެ ރައީސް އާދަމް ޝާމިލްއާއެކު އިއްޔެ ބޭއްވި ބައްދަލުވުމުގައި ޕީޖީ އައްބާސް ޝަރީފު ވިދާޅުވީ ކޮރަޕްޝަން ނައްތާލުމަށް އޭސީސީ އިން ކުރަމުންދާ މަސައްކަތުގައި ޕީޖީ އޮފީހުގެ ފުރިހަމަ އެއްބާރުލުމާއި އެހީތެރިކަން ލިބޭނެ ކަމަށެވެ. އަދި ކޮރަޕްޝަންގެ މައްސަލަތައް ކާމިޔާބު ކުރުމަށް ދެ މުއައްސަސާ އެކުގައި މަސައްކަތް ކުރުމުގެ މުހިއްމު ކަންވެސް ދެ ބޭފުޅުން ފާހަގަކުރެއްވި އެވެ.
ކޮރަޕްޝަން މައްސަލަތަކުގެ ތަހުގީގުތައް އިތުރަށް ހަރުދަނާ ކުރުމުގެ ގޮތުން ޕްރޮސެކިއުޓަރުންގެ އެހީތެރިކަން އޭސީސީގެ އިންވެސްޓިގޭޓަރުންނަށް ދޭނެ ކަމަށްވެސް ޕީޖީ ވިދާޅުވެފައިވެ އެވެ.