ބ. އޭދަފުށީގައި ހަތަރު އަހަރުގެ ކުޑަކުއްޖަކަށް އަނިޔާކުރި މައްސަލައެއްގެ ތުހުމަތުގައި އެ ކުއްޖާގެ މަންމަ ހައްޔަރުކޮށްފި އެވެ.
ފުލުހުން ބުނީ ހަތަރު އަހަރުގެ ކުޑަކުއްޖަކަށް އަނިޔާކުރި ކަމުގެ ތުހުމަތުގައި ރޭ އެ ކުއްޖާގެ މަންމަ ހައްޔަރުކޮށްފައިވާ ކަމަށެވެ. އުމުރުން 38 އަހަރުގެ އެ މީހާ ހައްޔަރުކުރީ އޭދަފުށީގައި ހުންނަ ފެމިލީ އެންޑް ޗިލްޑްރެންސް ސާވިސް ސެންޓަރުން ހުށަހެޅި މައްސަލައަކާ ގުޅިގެން ކަމަށް ފުލުހުން ބުންޏެވެ.
ގެވެށި އަނިޔާގެ ގާނޫނުގެ ދަށުން އެ އެ މީހާ ހައްޔަރުކުރީ ކޯޓު އަމުރަކާ ނުލަ އެވެ. އެ ގާނޫނުގެ ދަށުން ކޯޓު އަމުރަކާ ނުލައި ތަންތަނަށް ވަނުމާއި މީހުން ހައްޔަރު ކުރުމުގެ ބާރު ފުލުހުންނަށް އޮވެއެވެ.
ކުޑަކުއްޖަކަށް އަނިޔާކޮށްގެން ރޭ އޭދަފުށިން މީހަކު ހައްޔަރު ކުރިއިރު ވ. ރަކީދޫގައި ކުޑަކުއްޖަކަށް އަނިޔާކޮށް މަރާލި މައްސަލައެއް މިއަދު ވަނީ ފެންމަތިވެފަ އެވެ.