ބާސެލޯނާ އަދި ސްޕެއިންގެ ލެޖެންޑް އަންދްރޭސް އިނިއެސްޓާ ފުޓްބޯޅައިން ރިޓަޔާ ކުރަން ނިންމައިފި އެވެ.
އިނގިރޭސި ނޫހެއް ކަމަށްވާ ޑެއިލީ މެއިލްގައި ރިޕޯޓްކޮށްފައިވާ ގޮތުގައި އުމުރުން 40 އަހަރުގައި ރިޓަޔާ ކުރަން ނިންމި އިނިއެސްޓާ މިކަން ރަސްމީކޮށް އިއުލާނު ކުރާނީ އޭނާއަށް ވަރަށް ހާއްސަ ދުވަހެއްގަ އެވެ.
އެއީ މި މަހުގެ 23 ވަނަ ދުވަހު އެވެ. މި ދުވަހަކީ އިނިއެސްޓާ ބާސެލޯނާގައި ކުޅެމުންދިޔަ ދުވަސްވަރު، 2009 ވަނަ އަހަރު ޗެމްޕިއަންސް ލީގުގެ ފައިނަލްގައި ޗެލްސީއާ ދެކޮޅަށް ކުޅުނު މެޗުގައި އޭނާ ލަނޑެއް ޖަހާފައިވާ ދުވަހެވެ.
އިނިއެސްޓާ ވަނީ ބާސެލޯނާގައި 16 އަހަރު ހޭދަކޮށްފަ އެވެ. އޭނާ ބާސެލޯނާއިން ވަކިވެފައިވަނީ 2018 ވަނަ އަހަރު އެވެ. އޭގެ ފަހުން އޭނާ ކުޅެމުން އައީ ޖަޕާނުގެ ވިސެލް ކޯބޭ އަދި އެމިރޭޓްސްގެ އަލް ނަސްރު ކްލަބު ގައެވެ.
ސްޕެއިންގެ ގައުމީ ޓީމަށް އިނިއެސްޓާ ވަނީ 131 މެޗު ކުޅެ، 13 ލަނޑު ޖަހާފަ އެވެ. އަދި 2010 ވަނަ އަހަރުގެ ވޯލްޑް ކަޕް ކާމިޔާބުކުރުމުގައި އޭނާގެ ދައުރު ވަރަށް ބޮޑެވެ. އެ މުބާރާތުގެ ފައިނަލްގައި ނެދަލެންޑްސްއާ ދެކޮޅަށް ކުޅުނު މެޗުގައި އިނިއެސްޓާ ޖެހި ލަނޑުން ސްޕެއިން ވަނީ ފުރަތަމަ ފަހަރަށް ވޯލްޑް ކަޕް ކާމިޔާބުކޮށްފަ އެވެ.
ޑެއިލީ މެއިލްގެ ރިޕޯޓުގައި އިތުރަށް ބުނެފައިވަނީ އިނިއެސްޓާ ރިޓަޔާ ކުރުމަށްފަހު ކޯޗިން ދާއިރާއަށް ނުކުތުމަށް ވިސްނަމުންދާ ކަމަށެވެ. އަދި އޭނާގެ ކުރީގެ ޓީމްމޭޓުންނާއެކު މަސައްކަތްކުރުމަށް ޝައުގުވެރިކަން ފާޅުކޮށްފައިވާ ކަމަށްވެސް ރިޕޯޓުގައި ބުނެފައިވެ އެވެ.