ބާސެލޯނާގެ ރައީސް ޖޮއާން ލަޕޯޓާގެ އިސްތިއުފާއަށް ގޮވާލާ އަޑުތައް ވަރަށް ބޮޑަށް އިތުރުވެއްޖެ އެވެ.
ލަޕޯޓާގެ އިސްތިއުފާއަށް ގޮވަންފަށާފައިވަނީ ކުލަބަށް ގެނައި ޒުވާން ކުޅުންތެރިން ކަމުގައިވާ ޑެނީ އޮލްމޯ އަދި ޕައު ވިކްޓަ ރަޖިސްޓާ ކުރުމުގައި ދިމާވި މައްސަލަތަކާ ގުޅިގެންނެވެ.
މިދިޔަ ޖޫން މަހު 60 މިލިއަން ޔޫރޯއަށް ގަތް މި ދެ ކުޅުންތެރިން ރަޖިސްޓަ ކުރުމަށް ދެވުނު މުއްދަތު ޑިސެމްބަރު 31 ގައި ހަމަވިއިރުވެސް އެކަން ނުކުރެވުމާ ގުޅިގެން، ބާސެލޯނާއިން ވަނީ މި މައްސަލަ ކޯޓަށް ގެންދިއުމަށް ނިންމާފަ އެވެ.
މި މައްސަލައިގައި އެންމެ އިސްކޮށް ވާހަކަދައްކަމުން ދަނީ އެންމެ ފަހުގެ އިންތިހާބުގައި ލަޕޯޓާއާ ވާދަކޮށް ބަލިވި ވިކްޓަ ފޮންޓް އެވެ.
ފޮންޓް ވަނީ މި މައްސަލައާ ގުޅޭގޮތުން ނޫސް ބަޔާނެއްވެސް ނެރެފަ އެވެ. މީގެ އިތުރުން ބާސެލޯނާއަށް ނިސްބަތްވާ ކުލަބުތަކާއި އެސޯސިއޭޝަންތަކުންވެސް ވަނީ ލަޕޯޓާ އަދި އޭނާގެ ހިންގާ ކޮމިޓީ އިސްތިއުފާ ދިނުމަށް ގޮވާލާފަ އެވެ.
ދެހާސް އެކާވީސްވަނަ އަހަރު ދެވަނަ ދައުރަކަށް ހޮވުނު ލަޕޯޓާއަކީ މީގެ ކުރިން 2003 އިން 2010 އަށް ވެސް ބާސެލޯނާގެ ރައީސްކަން ކޮށްފައިވާ މީހެކެވެ. އޭނާގެ ފުރަތަމަ ދައުރަކީ ބާސެލޯނާއަށް ވަރަށް ކާމިޔާބު ދުވަސްތަކެކެވެ.
ލަޕޯޓާއާ ދެކޮޅަށް މަސައްކަތްކުރާ ފަރާތްތަކުން މިހާރު ގޮވާލަމުންދަނީ އޭނާގެ އިތުބާރު އޮތްތޯ ބެލުމަށް ވޯޓެއް ނެގުމަށެވެ. އަދި އެކަން ނުކޮށްފިނަމަ ކުލަބުގެ އާންމު މެންބަރުންގެ ސޮއިއާއެކު އިތުބާރު ނެތްކަމުގެ ވޯޓެއް ނެގުމަށް ރަސްމީކޮށް ހުށަހަޅާނެ ކަމަށް އެފަރާތްތަކުން ބުނެ އެވެ.