އިސްލާމީ ފަތުވާދޭ އެންމެ މަތީ މަޖިލީހާއި އިސްލާމިކް ޔުނިވަސިޓީ އޮފް މޯލްޑިވްސް (އައިޔޫއެމް)އާ ދެމެދު އެއްބަސްވުމެއްގައި ސޮއިކޮށްފި އެވެ.
އިސްލާމިކް ޔުނިވާސިޓީން ބުނީ މި އެއްބަސްވުމަކީ ދިވެހި މުޖުތަމައަށް ދީނީ ގޮތުން އެނގުން އެންމެ މުހިއްމު އަދި އެންމެ ބޮޑަށް މުޖުތަމައުގައި އޮޅުންއަރާ ކަމަށް ފެންނަ ކަންކަމާއި ދާއިރާތަކަކީ ކޮބައިކަން ދެނެގަތުގެ ބޭނުމުގައި އިލްމީ ދިރާސާކުރުމާއި އިދާރާތައް ގުޅިގެން ދީނީ އެކި ދާއިރާތަކުން ދީނީ، ޒަމާނީ، އިލްމީ މަސައްކަތްތަކެއް ކުރުމަށްޓަކައި އެކުލަވާލާފައިވާ އެއްބަސްވުމެއް ކަމަށެވެ.
މި އެއްބަސްވުމުގައި އިސްލާމިކް ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލާ ޑރ. އަލީ ޒާހިރު ބިން ސައީދު ގާސިމެވެ. އަދި އިސްލާމީ ފަތުވާދޭ މަޖިލީހުގެ ފަރާތުން ސޮއިކުރެއްވީ މަޖިލީހުގެ ރައީސް ޑރ. މުހައްމަދު ރަޝީދު އިބްރާހީމެވެ.
އެހީތެރިކަމާއި އެއްބާރުލުން ދެވޭނެ އާންމު ދާއިރާތައް
- ކަނޑައެޅޭ ދާއިރާތަކަކުން އިލްމީ ދިރާސާތައް ކުރުމާ އެކަމާ ގުޅުންހުރި ހަރަކާތްތައް ހިންގުން
- ދިރާސާތައް ކުރުމުގެ ބޭނުމަށްޓަކައި އިލްމުވެރިންގެ އެހީތެރިކަން ފޯރުކޮށްދިނުން
- ދިވެހިރާއްޖޭގެ ދީނީ އެއްބައިވަންތަކަމާއި ދީނީ ވަޙުދަތު ހިމާޔަތް ކުރުމާއި ދީނުގެ މެދުމިންވުމުގެ ސިޔާސަތު ދެމެހެއްޓުމުގައި އެއްބާރުލުން ދިނުން
- ރާއްޖޭގެ މުޖުތަމައުގައި ދިނީ ހޭލުންތެރިކަން އުފެއްދުމަށްޓަކައި އިލްމީ މަސައްކަތްތައް ކުރުމުގައި އެހީތެރިވުން
- އިލްމީ ފޮތްތައް އެކުލަވައިލުމާއި ތަރުޖަމާ ކުރުމުގައި އެހީތެރިވުން
- ރާއްޖޭގެ ދީނީ އިލްމުވެރިންގެ މެދުގައި ދެނެގަތުމާއި ގާތްވުން ދެމެހެއްޓުމުގެ ބޭނުމުގައި ސެމިނާތައް އިންތިޒާމު ކުރުމުގައި އެހީތެރިވުން
- މުޖުތަމައުގައި ދީނީ އަދި ގައުމީ ލޯބި އުފެއްދުމުގެ މަގުސަދު ހާސިލު ކުރުމުގައި އެއްބާރުލުން ދިނުން
އައިޔޫއެމް އިން ބުނީ އެއްބަސްވުމުގެ މަގުސަދތަކަކީ ދެ އިދާރާ ގުޅިގެން ދިވެހި މުޖުތަމައަށް ބޭނުންވާ އެކިއެކި ދީނީ، އިލްމީ ދިރާސާތައް ކުރުމާއި، ގުޅުންހުރި ދާއިރާތަކުން އެއްބާރުލުން ދިނުން ކަމަށެވެ.
މީގެއިތުރުން ދީނީ އެއްބައިވަންތަކަމާއި ދީނީ ހޭލުންތެރިކަން އިތުރު ކުރުމަށްޓަކައި ބޭނުންވާ ދިރާސާތަކާއި އިލާމީ މަސައްކަތްތައް ކުރުންވެސް އެއްބަސްވުމުގެ މަގުސަދުތަކުގެ ތެރޭގައި ހިމެނެއެވެ.