މިނިވަން އަދި ތަހުޒީބު ގައުމެއްގެ ގޮތުގައި އެތައްހާސް އަހަރަކަށް ރާއްޖެ ދެމިއޮތުމަށްޓަކައި އެންމެ މުހިއްމު ކަމަކީ، ދިވެހި ގައުމިއްޔަތު ނެގެހެއްޓުން ކަމުގައި ނައިބް ރައީސް ހުސައިން މުހައްމަދު ލަތީފް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު ހެނދުނު ކުރިއަށް ދިޔަ "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ދިވެހިރާއްޖޭގެ އިސްލާމީ ޔުނިވަސިޓީގައި ކުރިއަށްދިޔަ މި ރަސްމިއްޔާތުގައި ވާހަކަފުޅު ދައްކަވަމުން ނައިބް ރައީސް ވަނީ "ކަޅުއޮށްފުންމި - ދިވެހި ގައުމިއްޔަތުގެ ދަރުބާރު" އަކީ ދިވެހީންގެ ގައުމިއްޔަތާ އަމިއްލަވަންތަކަން ރައްކާތެރިކުރުމަށާއި އެކަމަށް ހޭލުންތެރިކަން އިތުރުކުރުމަށް ކުރިއަށް އެޅޭ ވަރަށް ހަރުދަނާ، އަދި އީޖާބީ ފިޔަވަޅެއްގެ ގޮތުގައި ފާހަގަކުރައްވާފަ އެވެ.
ނައިބް ރައީސް ވިދާޅުވީ މިއަދު ފެށިގެންދިޔަ ދަރުބާރުގައި ދިވެހި ގައުމިއްޔަތާ ގުޅުންހުރި، އަދި ދިވެހީންގެ އަމިއްލަވަންތަ ކަމާ ގުޅުންހުރި ވަރަށް މުހިއްމު ދާއިރާތަކަކުން މައުލޫމާތު ހުށަހެޅި އިލްމީ މަޝްވަރާތަކެއް ކުރެވި އާ އީޖާދީ ވިސްނުންތަކެއް ލިބިގެންދާނެ ކަމަށް ޔަގީންކުރައްވާ ކަމަށެވެ.
ނައިބް ރައީސްގެ ވާހަކަފުޅުގައި ވަނީ ދިވެހީންނަކީ ވަރަށް ނަސީބުވެރި ބައެއްކަމުގައިވެސް ފާހަގަކުރައްވާފަ އެވެ. އެގޮތުން ރާއްޖޭގެ ގުދުރަތީ ރީތިކަމުގެ ވާހަކަ ދުނިޔޭގެ އެކި ކަންކޮޅުތަކުގައި މަޝްހޫރުވެފައިވާ ކަމުގައި ވިދާޅުވި އެވެ.
ދިވެހި ބަހުގެ ޗާލުކަމާއި ރާއްޖޭގެ ގައުމިއްޔަތުގެ ބަހާތަކަކީވެސް ރާއްޖެއަށް ލިބިފައިވާ އިތުރު ޒީނަތްތެރި ކަމެއްގެ ގޮތުގައި ދުނިޔެއަށް ހާމަކޮށްދޭން ޖެހޭ ކަމުގައިވެސް ނައިބް ރައީސް ވިދާޅުވި އެވެ. ހަމައެއާއެކު ރާއްޖޭގެ އަމާންކަން، ދިވެހީންގެ އެކުވެރިކަން، ހުލްގު ހެޔޮކަން މި ގައުމަށް އަންނަ ކޮންމެ ފަތުރުވެރިއަކަށް އަމަލީގޮތުން ދެއްކުމަށްވެސް އެދިވަޑައިގެންނެވި އެވެ.
މިރަސްމިއްޔާތުގައި ނައިބް ރައީސް ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ދިވެހީންގެ އަމިއްލަވަންތަ ކަމާ ގައުމިއްޔަތު ހިމާޔަތް ކުރެއްވުމަށް ސަމާލުކަން ދެއްވާ މިންވަރުވެސް ފާހަގަކުރައްވާފަ އެވެ.
"އެގޮތުން ތައުލީމީ މަންހަޖުގައި ގައުމިއްޔަތު، ވަކި މާއްދާއެއްގެ ގޮތުގައި ހިމެނުއްވުމާއި، ދިވެހި ދިދަ އަށާއި، ދިވެހީންގެ ގައުމީ ސަލާމަށް ހާއްސަ އިސްކަމެއް، ރައީސް ދެއްވާ،" ނައިބް ރައީސް ވިދާޅުވި އެވެ.
އެމަނިކުފާނު ވިދާޅުވީ ދިވެހި ގައުމިއްޔަތުގެ ކޮލެޖް ގާއިމުކުރައްވައި، ގައުމިއްޔަތުގެ އިސްވަރު އުފައްދަވައި، ގައުމީ ކަންކަން އެންމެ އުހަށް ނަންގަވަން، ރައީސުލްޖުމްހޫރިއްޔާ ކުރައްވަމުން ގެންދަވާ މަސައްކަތްޕުޅަށް އެންމެހާ ދިވެހީން އެއްބާރުލުން ދޭން ޖެހޭ ކަމަށެވެ.
ކަޅުއޮށްފުންމި ދަރުބާރަކީ ދިވެހީންގެ އެއްބައިވަންތަކަމާއި ދެމިތިބުމާމެދު ވިސްނައި، ފިކުރުކުރުމުގެ ބައްދަލުވުމެކެވެ. އަދި އެއީ ދިވެހިވަންތަކަމުގެ ބަހާތަކުގެ ފަންނީ، އިލްމީ ބައިވެރިންގެ މެދުގައި ގުޅުން ބަދަހިކޮށް އާލާކުރުމުގެ ހަފްލާ އެކެވެ. ދިވެހިވަންތަކުމުގެ ސިފަތައް އިލްމީ ނަޒަރުން މާނަކުރުމަށް ހިތްވަރުދީ، އެފަދަ މަސައްކަތްތައް އާންމުކުރުން، އަދި ދިވެހީންގެ ރަށްވެހިކަމާއި، ވަޒަންވެރިކަމާއި، ކަނޑުވެރިކަމަށް މަގުފަހިވާނޭ ވިސްނުމާއި އިލްމުތައް، ދިވެހިރާއްޖެއަށް ވެރިކުރުމަށް ހިތްވަރުދީ ކުރިއެރުވުން، މި ކޮންފަރެންސްގެ ލަނޑުދަނޑިތަކުގެ ތެރޭގައި ހިމެނެ އެވެ.