ފަސް މިލިއަން ގަސް އިންދުމުގެ ޕްރޮގްރާމްގައި ބައިވެރިވެ 750،000 ގަސް އިންދުމަށް ސޯޝަލް ޑިމޮކްރެޓިކް ވެންޗާސް ޕްރައިވެޓް ލިމިޓެޑް (އެސްޑީއެމް) އިން އެންވަޔަރަންމަންޓް މިނިސްޓްރީއާ އެކު އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގައި ސޮއިކުރިކަން ހާމަކޮށް އެސްޑީ އެމްއިން ވަނީ ސޯޝަލްމީޑިއާގައި ޕޯސްޓެއްވެސް ކޮށްފަ އެވެ.
އެސްޑީއެމްއިން ބުނީ ސަރުކާރުން ފަށާފައިވާ ފަސް މިލިއަން ގަސްއިންދުމުގެ ޕްރޮގްރާމުގައި ބައިވެރިވުމުގެ ގޮތުން 750،000 ގަސް ރާއްޖޭގެ އެކި ރަށްރަށުގައި އިންދާނެ ކަމަށެވެ.
އެންވަޔަރަންމަންޓް މިނިސްޓަރު ތޯރިގު އިބްރާހީމް ވިދާޅުވީ ފަސް މިލިއަން ގަސް އިންދުމުގެ ޕްރޮގްރާމުގެ ތެރެއިން މިހާތަނަށް ހަތަރު ލައްކައެއްހާ ގަސް އިންދިފައިވާ ކަމަށެވެ.
"އެހެންވެ ކުރިއަށް އޮތް ހަތަރު އަހަރު ތެރޭގައި ފަސް މިލިއަން ގަސް އިންދޭނެ ކަމަށް އުއްމީދުކުރަން،" މިނިސްޓަރު ވިދާޅުވި އެވެ.
ތޯރިގު ވިދާޅުވީ މިޕްރޮގްރާމުގެ ފުރަތަމަ ދުވަހުވެސް 398،000 ގަސް އިންދާފައިވާ ކަމަށެވެ.
ފަސް މިލިއަން ގަސް އިންދުމުގެ ޕްރޮގްރާމަކީ ސަރުކާރުގެ މެނިފެސްޓޯގައި ހިމެނޭ މުހިއްމު ރިޔާސީ ވައުދެކެވެ.
ރައީސްގެ ވައުދު ފުއްދުމަށް އެހީވުމުގެ ގޮތުން އެމްޕީއެލް އިން އެކަނިވެސް ވަނީ އެއް މިލިއަން ގަސް އިންދަން ނިންމާފަ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދެކަނބަލުން މި ޕްރޮގްރާމް ފައްޓަވައި ދެއްވީ މިއަހަރުގެ ދުނިޔޭގެ ތިމާވެށީގެ ދުވަހު -- ޖޫން ފަސްވަނަ ދުވަހު އެވެ.