ދައުލަތުގެ ޓެކްސް އިދާރާ -- މީރާގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް ބޭފުޅަކު އައްޔަންކުރުމަށް ރުހުން ހޯދުމަށްޓަކައި ދެ ބޭފުޅެއްގެ ނަން ރައްޔިތުންގެ މަޖިލީހަށް ހުށަހަޅައިފި އެވެ.
މީރާގެ ޑެޕިއުޓީ ކޮމިޝަނާ ޖެނެރަލް އޮފް ޓެކްސޭޝަންގެ މަގާމަށް އައްޔަންކުރާނީ އެއް ބޭފުޅެކެވެ.
މިވަގުތު އެ މަގާމުގައި ހުންނެވީ ހއ. އިހަވަންދޫ، ވައިޖެހޭގެ، އަސްމާ ޝަފީއު އެވެ. އޭނާގެ މަގާމުގެ ދައުރު ހަމަވާނީ މިމަހުގެ 31 ވަނަ ދުވަހުގެ ނިޔަލަށެވެ.
މީރާގެ ޑެޕިއުޓީ ކޮމިޝަނާ ޖެނަރަލްގެ މަގާމަށް ކުރިމަތިލުމަށް އާންމުކޮށް ހުޅުވާލުމުން ކުރިމަތިލެއްވި ބޭފުޅުންގެ ތެރެއިން ރައީސުލްޖުމްހޫރިއްޔާއަށް ފެނިވަޑައިގަންނަވާ ދެ ބޭފުޅެއްގެ ނަން ވަނީ މަޖިލީހަށް ފޮނުއްވާފަ އެވެ.
މަޖިލީހުގެ މިއަދުގެ ޖަލްސާގައި އަމީންއާންމު ފާތިމަތު ލިއުޝާ ވަނީ މީރާގެ ޑެޕިއުޓީ ކޮމިޝަނަރު ކަމަށް އައްޔަންކުރަން މަޖިލީހަށް ފެންނަ ނަމަކަށް ރުހުން ދިނުމަށް އެދިވަޑައިގެން ރައީސުލްޖުމްހޫރިއްޔާ މަޖިލީހަށް ފޮނުއްވި ސިޓީގައިވާ ދެ ނަން އިއުލާންކުރައްވާފަ އެވެ.
އެގޮތުން ސިޓީގައި ހިމެނޭ ދެ ނަމަކީ މިހާރުވެސް އެ މަގާމުގައި ހުންނެވި އަސްމާ ޝަފީއު އާއި ގދ. ގައްދޫ، ކޯޒީރައުންޑް، ފާތިމަތު އަމީޒާ އެވެ. ރައީސްގެ ސިޓީގައި އިސްކަންދެއްވާފައިވަނީ ފާތިމަތު އަމީޒާ އަށެވެ.
އެންފޯސްމަންޓް ހެޑް
މީރާގެ ކޮމިޝަނާ ޖެނެރަލް އޮފް ޓެކްސޭޝަންގެ މަގާމުގައި މިހާރު ހުންނެވީ ކުރިން ޑެޕިއުޓީ ކޮމިޝަނާ ޖެނަރަލްގެ މަގާމުގައި ފުރުއްވި ހަސަން ޒަރީރު އެވެ. އޭނާ މީރާގެ ކޮމިޝަނަރު ކަމަށް އައްޔަންކުރެއްވީ މިދިޔަ މަހުގެ 23 ވަނަ ދުވަހު އެވެ.