ބައެއް ޓެކްސްތައް ބޮޑުކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ ހަތަރު ބިލެއް ދިރާސާކުރަން މުޅި މަޖިލީހުގެ ކޮމިޓީ ބައްދަލުވުމެއް މިއަދު ބޭއްވުމަށް ނިންމައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ މަޖިލީހުގެ މިއަދުގެ ޖަލްސާއަށްފަހު މުޅި މަޖިލީހުގެ ކޮމިޓީ ބައްދަލުވުމެއް ބޭއްވުމަށް ގަސްތު ކުރައްވާ ކަމަށް ވިދާޅުވެފަ އެވެ.
މި ކޮމިޓީގައި މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލާއި ޓޫރިޒަމާ ބެހޭ ގާނޫނަށް އިސްލާހު ގެނައުމުގެ ބިލާއި ރާއްޖޭގެ އެއާޕޯޓްތަކުން ރާއްޖޭން ބޭރަށް ފުރާ ޕަސިންޖަރުންގެ އަތުން ޓެކްސް ފީ ނެގުމުގެ ގާނޫނަށް އިސްލާހު ގެނައުމުގެ ބިލު އަދި އެކްސްޕޯޓް އިމްޕޯޓް ގާނޫނަށް އިސްލާހު ގެނައުމުގެ ބިލު ދިރާސާ ކުރާނެ ކަމަށް އަބްދުއްރަހީމް ވިދާޅުވި އެވެ.
މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނުގެ ދަށުން މިހާރު 16 ޕަސެންޓްގައި ނަގާ ޓީޖީއެސްޓީ 17 ޕަސެންޓަށް އިތުރުކުރަން ސަރުކާރުގެ ފަރާތުން ވަނީ އެ ގާނޫނަށް އިސްލާހު ހުށަހަޅާފަ އެވެ.
ސަރުކާރުން ވަނީ ގްރީން ޓެކްސް ބޮޑުކުރަން ދިވެހިރާއްޖޭގެ ޓޫރިޒަމާބެހޭ ގާނޫނަށްވެސް އިސްލާހު ހުށަހަޅާފަ އެވެ.
މީގެ އިތުރުން ދިވެހިރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ގާނޫނަށް އިސްލާހު ގެނެސް އެއާޕޯޓް ޑިވެލޮޕްމަންޓް ފީއާއި ޑިޕާޗާ ޓެކްސް ބޮޑުކުރަން ވަނީ ހުށަހަޅާފަ އެވެ.
ސަރުކާރުގެ ފަރާތުން ހުށަހެޅި ގޮތަށް އިސްލާހު ފާސްވެއްޖެނަމަ އިކޮނޮމީ ކްލާހުގައި ދަތުރުކުރާ ބިދޭސީއެއްގެ އަތުން މިހާރު ނަގަމުންދާ 30 ޑޮލަރުގެ ފީ 50 ޑޮލަރަށް އުފުލިގެންދާނެ އެވެ. މިއިސްލާހުގައި ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން ނަގަން ހުށަހަޅާފައިވަނީ 120 ޑޮލަރެވެ. މިހާރު ނަގަމުން ދަނީ 60 ޑޮލަރެވެ. އަދި ފަސްޓް ކްލާހުގައި ދަތުރުކުރާ އެންމެންގެ އަތުން 240 ޑޮލަރު ނަގަންވެސް ހުށަހަޅާފައިވެ އެވެ. މިހާރު ނަގަމުން ދަނީ 90 ޑޮލަރެވެ.
ރާއްޖެ އަންނަ ޕްރައިވެޓް ޖެޓުތަކުގައި ދަތުރު ކުރާ ކޮންމެ މީހެއްގެ އަތުން މިހާރު ނަގަމުން ދަނީ 120 ޑޮލަރެވެ. ނަމަވެސް ސަރުކާރުން ހުށަހަޅާފައިވަނީ އެ އަދަދު 480 ޑޮލަރަށް އިތުރުކުރުމަށެވެ.
މީގެ އިތުރުން އެކްސްޕޯޓް އިމްޕޯޓް ގާނޫނަށް ސަރުކާރުން ހުށަހެޅި އިސްލާހަކީ ވޭޕް ކުރުމަށް ބޭނުން ކުރާ އާލާތްތަކާއި އިލެކްޓްރިކް ސިނގިރޭޓުން ނަގާ އިމްޕޯޓު ޑިއުޓީ ބޮޑުކުރުމަށް ހުށަހެޅި އިސްލާހެކެވެ.