އިލެކްޓްރިކަލް ދާއިރާއަށް އަންހެނުން ޝައުގުވެރިކުރުވައި، އެ ދާއިރާގައި ފިރިހެނުންނާއި އެއްހައެއްގައި މަސައްކަތް ކުރުމުގެ ފުރުސަތު ފަހިކޮށްދިނުމަށްޓަކައި އަންހެނުންނަށް ހާއްސަ ކަރަންޓް ކޯހެއް ފަށަން ސްޓެލްކޯ އިން ތައްޔާރުވެއްޖެ އެވެ.
ސްޓެލްކޯއިން މިއަދު ބުނީ އިލެކްޓްރިކަލް ދާއިރާއަށް އަންހެނުން ޝައުގުވެރިކުރުވައި، އެ ދާއިރާގައި ފިރިހެނުންނާއި އެއް ހަމައެއްގައި މަސައްކަތް ކުރުމުގެ ފުރުސަތު ފަހިކޮށްދިނުމަށްޓަކައި "ބިގިނާސް އިލެކްޓްރީޝަން ކޯސް ފޯ ވިމެން"ގެ ނަމުގައި ކަރަންޓާ ގުޅޭ އަސާސީ ކަންކަން ކިޔަވައިދިނުމަށް ހާއްސަ ކޯހެއް ހިންގުމަށް ތައްޔާރުވެފައިވާ ކަމަށެވެ.
މި ކޯހުގައި ހިލޭ ބައިވެރިވުމުގެ ފުރުސަތު މިހާރު ވަނީ ހުޅުވާލާފަ އެވެ.
ރައްކާތެރި ގޮތުގައި ކަރަންޓު ބޭނުންކުރުމާއި، ކަރަންޓަށް ކުރާ ހަރަދު ކުޑަކުރުމުގެ އިތުރުން، ކަރަންޓު ވަޔަރު ކުރުމުގެ އަސާސީ މައުލޫމާތު މި ކޯހުގައި ކިޔަވައިދިނުމަށް ހަމަޖެހިފައިވެ އެވެ.
އުމުރުން 16 އަހަރު ވެފައިވާ ކޮންމެ މީހަކަށްސް މި ކޯހުގައި ބައިވެރިވެވޭނެ އެވެ.
ދުވާލަކު ތިން ގަޑިއިރު ކިޔަވަންޖެހޭ މިކޯހުގެ މުއްދަތަކީ ހަތަރު ދުވަހެވެ.
މާލޭގައި ބާއްވާ މިކޯހުގައި ބައިވެރިވުމުގެ ފުރުސަތު ހުޅުވާލާފައިވަނީ އަންނަ މަހުގެ ހަތަރުވަނަ ދުވަހުގެ މެންދުރުފަހު 3:00ގެ ނިޔަލަށެވެ.