ފަލަސްތީންގައި ހާލުގައި ޖެހިފައި ތިބި ނިކަމެތިންނަށް އެހީދިނުމަށް އދއިން ހުޅަނގު އައްސޭރީގެ ނޫރުއްޝަމްސް ރެފިއުޖީ ކޭމްޕްގައި އިމާރާތްކޮށްފައި ހުރި އަންރާ އޮފީސް، އިޒުރޭލުގެ އަސްކަރީ ބުލްޑޯޒަރުތަކުން ތަޅާ ބިމާ ހަމަކޮށްފި އެވެ.
އިޒުރޭލު ސިފައިން، "ޔޫއެން އެޖެންސީ ފޮ ޕަލެސްޓީނިއަން ރެފިއުޖީޒް" (އަންރާ) އޮފީސް މި ތަޅާލީ ޔަހޫދީ ދައުލަތުން ފާސްކުރި ގާނޫނެއް ތަންފީޒުކުރުމަށެވެ.
ޔަހޫދީ ދައުލަތުން ވަނީ ޒަޔަނިސްޓުން ވަކިއަޅައި ފޭރިގެންފައި ހުރި އަރަބިންގެ ބިންތަކުގައި ރެފިއުޖީންނަށް އެހީދޭ އޮފީހެއް ހިންގުން މަނާކޮށްފަ އެވެ. މި ގޮތުން އަންރާ އޮފީސްތައް ބަންދުކޮށް އަދި އެ ބިންތައް އިސްތިއުމާރުކުރަމުން އެ ދަނީ އެވެ.
އަންރާގެ އޮފިޝަލުން ބުނާ ގޮތުން އެ އިމާރާތް މީގެ ކުރިން ވެސް ހުރީ ކޮންމެވެސް ވަރަކަށް ހަލާކުވެފަ އެވެ. އެއީ އިޒުރޭލުގެ އަސްކަރިއްޔާއިން މީގެކުރިން ދިން ހަމަލާތަކެއްގެ ސަބަބުންނެވެ.
ޔަހޫދީ ދައުލަތުގެ ބާރުގެ ތެރޭގައި އަންރާ ހިންގުން މަނާކުރުމަށް އޮކްޓޯބަރު 29 ގައި ވަނީ ގާނޫނެއް ފާސެކޮށްފަ އެވެ. މި ގާނޫނަށް އަމަލުކުރަން ފެށުމުން ފަލަސްތީނަށް އިންސާނީ އެހީ ދެވެން ހުރި ދޮރުތައް ގާތްގަނޑަކަށް ބަންދުވާނެ އެވެ.
އިޒުރޭލުގައި އަންރާ މަނާކުރީ ފާއިތުވި އަހަރު އޮކްޓޯބަރު ހަތެއްގައި، ހަމާސްގެ ހަނގުރާމަވެރިން ޔަހޫދީ އާބާދީތަކަށް ވަދެގަނެ ދިން ހަމަލާތަކުގައި އަންރާގެ މުވައްޒަފުން ބައިވެރިވި ކަމަށް ބުނެ އެވެ. އަދި ޣައްޒާގައި ހުންނަ އަންރާގެ މައި އޮފީހުގައި ހަމާސްގެ ހަރަކާތްތައް ހިންގާ ކަމަށް ވެސް އިޒުރޭލު ތުހުމަތުކުރެ އެވެ.
އިޒުރޭލުގައި އަންރާ މަނާކުރަން ގާނޫނު ހަދާ މަޖިލީހުގައި ނެގި ވޯޓަށް 90 މެމްބަރަކު ރުހުން ދެއްވި އެވެ. ކްނެސެޓްގައި ހިމެނޭ 120 ގޮނޑީގެ ތެރެއިން މި ބިލާ އިދިކޮޅަށް ވޯޓު ދެއްވީ އެންމެ 10 މެމްބަރެކެވެ.
އިޒުރޭލުގެ މި ގޮތްކުޑަ އަމަލު މުޅި ދުނިޔެއިން ކުށްވެރިކުރި ނަމަވެސް، އިޒުރޭލު މިހާރު އޮތީ އެމެރިކާ ނޫން ބަޔަކަށް ނުހުއްޓުވޭ ހިސާބުގަ އެވެ. ގަބޫލުކުރެވޭ ގޮތުގައި އެމެރިކާގައި މި އަހަރު އޮންނަ ރިޔާސީ އިންތިޚާބު ވަކި ގޮތަކަށް ނިމެންދެން، ޔަހޫދީންގެ ޖެއްސުންކުރުން ފަލަސްތީންގެ އާންމުންނަށް އިންތިހާއަށް ބޮޑުވާނެ އެވެ.
ފަލަސްތީންގެ އާންމުނާ ހަވާލާދީ ޚަބަރުތައް ބުނާ ގޮތުން އެމެރިކާޣެ ވެރިކަށް ކޮންމެ މީހަކު އިސްކުރެވުނު ނަމަވެސް، ފަލަސްތީންއާ މެދު އެމެރިކާ ދެކޭ ގޮތަށް ބަދަލެއް ނާންނާނެ އެވެ.
ޔަހޫދީންގެ މަސްލަހަތަށް ބެލުމެއް ނެތި ފަލަސްތީނަށް ހެޔޮ އެއްވެސް ގޮތަކަށް އެމެރިކާ އަމަލެއް ނުކުރާނެ އެވެ.