އިޒުރޭލާއި އދއާ ދެމެދު 1967 ގައި ސޮއިކޮށްފައި އޮތް އަންރާ އެއްބަސްވުން އިޒުރޭލުން އުވާލާނެކަން ރަސްމީކޮށް އދއަށް އަންގައިފި އެވެ.
ފަލަސްތީންގައި ހާލުގައި ޖެހިފައި ތިބި އާންމު ރައްޔިތުންނަށް އެހީތެރިކަން ފޯރުކޮށްދިނުމަށް ޣައްޒާ، ހުޅަނގު އައްސޭރި އަދި އިޒުރޭލުގައި އަންރާގެ އޮފީސްތައް މީގެކުރިން ހިންގި އެވެ.
ނަމަވެސް އަންރާގެ ވެރިން ޓެރަރިސްޓުންނާ ގުޅުން ބާއްވާ ކަމަށް ތުހުމަތުކޮށް އިޒުރޭލުން ވަނީ އަންރާ ހިންގުން ގާނޫނަކުން މަނާކޮށްފަ އެވެ.
އަންރާ މަނާކޮށް އދގެ އާންމު މަޖިލީހުގެ ރައީސަށް އިޒުރޭލުގެ ހާރިޖީ ވުޒާރާގެ ޑައިރެކްޓަރު ޖެނެރަލް ފޮނުއްވި ސީޓީއެއްގައި، އިޒުރޭލުގައި އަންނާ މަނާކުރި ނަމަވެސް ފަލަސްތީނަށް އެހީވުމަށް ބައިނަލްއަގްވާމީ އެހެން އެޖެންސީތަކާ ގުޅިގެން ހަރަކާތްތައް ހިންގޭނެ ކަމަށް ވަނީ ބުނެފަ އެވެ.
އދގެ އެހެން އެޖެންސީތައް އިޒުރޭލުގައި މަނާނުކުރާ ކަމަށްވެސް ވަނީ ބުނެފަ އެވެ. އިޒުރޭލުގެ ގާނޫނުއަސާސީއާ އެއްގޮތަށް އދގެ ހުރިހާ ގުނަވަނަކަށް ވެސް ހަރަކާތްތެރިވެވޭނެ ކަމަށް ވެސް އޮތީ ބުނެފަ އެވެ. ނަމަވެސް އދގެ ކަންބޮޑުވުމަކީ ހާލުގައި ޖެހިފައި ތިބި މީހުން އެހީދިނުމަށް ގިނަ ދުވަސްތަކެއް ހޭދަކުރަން ޖެހުމެވެ.
އިޒުރޭލުން އަންރާ މަނާކުރީ ގައުމަށް ހުރި ނުރައްކަލެއް ކަމަށް ބުނެ އެވެ. އަންރާ އޮފީހުގައި ޓެރަރިސްޓް ހަރަކާތްތައް ހިންގުމުގެ އިތުރުން، ޓެރަރިސްޓުންނަށް މަދަދުވެރިވާ ކަމަށް ވެސް އިޒުރޭލުން ތުހުމަތުކުރެ އެވެ.
އަންރާގެ އޮފީސްތައް ރަސްމީކޮށް އިޒުރޭލުގައި ހިންގިއިރުވެސް، ޣައްޒާއަށް އެހީދިނުން ވަރަށް ބޮޑަށް ވަނީ ލަސްވެފަ އެވެ. ނޫސްވެރިން ބުނާ ގޮތުން އެއީ ގަސްދުގައި އިޒުރޭލުގެ އިދާރާތަކުން ކަންކުރާ ގޮތެވެ.