އީރާނުގެ ޖަމްޝީދު ޝަރުމާހްދު މަރަން ހުކުމްކޮށް އަދި މަރުގެ ހުކުމް ތަންފީޒުކުރުމާ ގުޅިގެން ޖަރުމަނުގައި ހުރި އީރާނުގެ ތިން ކޮންސިއުލޭޓް ބަންދުކުރަން އެ ގައުމުން ނިންމައިފި އެވެ.
ޖަރުމަންގެ ޚާރިޖީ ވަޒީރު އަނާލީނާ ބެއާބޮކް ވިދާޅުވި ގޮތުން ޖަމްޝީދު ޝަރުމާހްދު ނުމެރުމަށް އީރާންގެ ކިބައިން ތަކުރާރުކޮށް އެދުމުންވެސް، އެދެވޭ ޖަވާބެއްް ނުދިނެވެ.
ޖަމްޝީދު ޝަރުމާހްދު އަކީ ޖަރުމަނާއި އީރާންގެ ރަށްވެރިކަން އޮން މީހެކެވެ. އޭނާގެ މަސްލަހަތު ހިމާޔަތްކުރުމަކީ ޖަރުމަންގެ ސަރުކާރަށް ލާޒިމުކަމެއް ކަމަށް ޚާރިޖީ ވަޒީރު ވިދާޅުވި އެވެ.
ބެއާބޮކް ވިދާޅުވި ގޮތުން ތެހެރާންގެ މި އަމަލު ކުށްވެރިކޮށް އަދަބު ދިނުމުގެ ގޮތުން ޖަރުމަނުގެ ފްރޭންކްފާޓް، މިއުނިކް އަދި ހަމްބުގްގައި ހުންނަ އީރާންގެ ކޮންސިއުލޭޓް ބަންދުކުރަން ނިންމެވީ އެވެ.
އީރާނުން ޖަމްޝީދު ޝަރުމާހްދު، 69، މަރަން ހުކުމްކުރީ ފެބްރުއަރީ 2023 ގައެވެ. އޭނާގެ ކުށަކީ އީރާންގައި ކޮރަޕްޝަން ހިންގުމެވެ. އަދި އީރާންގެ ޝިރާޒްގައި ހުންނަ މިސްކިތެއްގައި 2008 ގައި ބޮމެއް ގޮއްވާލައި 14 މީހަކު މެރީ އޭނާ ކަމަށްވެސް އިރާނުން ބުންޏެވެ.
ޖަމްޝީދަކީ އޭނާގެ އާއިލާއިން ބުނާ ގޮތުން ކުށެއް ނެތް މައުސޫމް މީހެކެވެ. އޭނާ އަކީ އެއްވެސް އިރެއްގައި ކޮރަޕްޝަނަށް މަގުފަހިވާ ޒާތުގެ އަމަލެއް ހިންގާފައިވާ މީހުން ނޫން ކަމަށް އާއިލާއިން ބުންޏެވެ.
ނަމަވެސް، އީރާންގެ ބުނުމަކީ ޖަރުމަންގެ ޕާސްޕޯޓެއް އޮތުމަކީ ކުށުން ބަރީއަވެވޭނެ ސަބަބެއް ނޫން ކަމަށެވެ. ޖަރުމަނުގެ ރައްޔިތުކަން އޮތް ނަމަވެސް، އީރާނުން އޭނާގެ މައްޗަށް އިއްވާފައި އޮތް ހުކުމް ތަންފީޒުކުރާނެ ކަމަށް އީރާނުން އޮތީ ބުނެފަ އެވެ.
ޖަރުމަނުގެ އިތުރުން މުޅި ޔޫރަޕުން ވެސް ވަނީ ޖަމްޝީދު މެރުމަކީ ރަނގަޅު ނޫން ކަމެއް ކަމަށް ބުނެފަ އެވެ.
އީރާންއާ އެކު އޮތް ގުޅުމަށް ބުރާއަރާނެ ކަމަށް ބުނެ ޖަރުމަނުންގެ ޗާންސެލަރު އޯލަފް ޝޯލްޒް ވެސް ވަނީ އެ ހުކުމް ތަންފީޒު ނުކުރުމަށް އީރާނަށް ގޮވާލާފަ އެވެ.