ސަރުކާރުން ހަރަދު ކުޑަކުރުމަށް އަޅާ ފިޔަވަޅުތަކުގެ ދަށުން ސިޔާސީ މަގާމުތަކުގައި ތިއްބެވި 248 ބޭފުޅަކު އިއްޔެގެ ނިޔަލަށް ވަޒީފާ އިން ވަކިކޮށްފި އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިމަހުގެ 15 ވަނަ ދުވަހު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ
ސިޔާސީ މަގާމުތަކުގައި ތިއްބެވި ބޭފުޅުންގެ ތެރެއިން 15 ދުވަސް ތެރޭގައި 228 ބޭފުޅުން ވަކިކުރަން ނިންމަވާފައިވާ ކަމަށެވެ.
ރައީސް އޮފީހުގެ އިސް ތަރުޖަމާން ހީނާ މިއަދު ވިދާޅުވީ ރައީސްގެ ވައުދާ އެއްގޮތަށް އަދި ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން އިއްޔެގެ ނިޔަލަށް 248 ސިޔާސީ މުވައްޒަފުން މަދުކޮށްފައިވާ ކަމަށެވެ.
ހީނާ އިތުރަށް ވިދާޅުވީ ސިޔާސީ މުވައްޒަފުންގެ މަސައްކަތުގެ ފެންވަރު ބަލައި، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕާފޯމަންސް ބަލާނެ ނިޒާމެއް ގާއިމުކުރުމަށް ކެބިނެޓުންވެސް ނިންމާފައިވާ ކަމަށެވެ.
"މިނިޒާމަށް ވަރަށް އަވަހަށް އަމަލުކުރަން ފަށާނެ،" ހީނާ ވިދާޅުވި އެވެ.
ސަރުކާރުގެ ސިޔާސީ މަގާމުތަކުގެ ޖުމްލަ އަދަދު މިއަދު ހާމަކުރާނެ ކަމަށް ހީނާ މި ހަފްތާގައި ވިދާޅުވެފައިވެ އެވެ. ނަމަވެސް އެ މައުލޫމާތު އަދި ހަމާކޮށްފައެއް ނުވެ އެވެ.