ވޮލީބޯލް އެސޯސިއޭޝަން ކަޕްގެ ފިރިހެންގެ ޑިވިޝަނުގެ ޗެމްޕިއަންކަން، ރޭ ކުޅުނު ފައިނަލް މެޗުގައި ދިވެހި ސިފައިންގެ ކްލަބު 3-2 އިން ބަލިކޮށް އެޗްޑީސީ އިން ފުރަތަމަ ފަހަރަށް ހޯދައިފި އެވެ.
ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މި މެޗުގައި ގިނަ ބަޔަކަށް ހިތްގައިމު މަންޒަރުތަކެއް ފެނުނުއިރު ފުރަތަމަ ސެޓު ސިފައިން 25-20 އިން އަދި ދެވަނަ ސެޓު އެޗްޑީސީ 31-29 އިން ކާމިޔާބުކުރި އެވެ. ތިން ވަނަ ސެޓު އެޗްޑީސީން 25-20 އިން އަދި ހަތަރުވަނަ ސެޓު ސިފައިން 25-17 އިން ކާމިޔާބުކުރި އެވެ. އެންމެ ފަހު ސެޓު އެޗްޑީސީން 15-13 އިން ކާމިޔާބުކޮށް، އެ ޓީމުން މުޅި މެޗު އަނބުރާލި އެވެ.
މި މެޗުގެ އެންމެ މޮޅު ކުޅުންތެރިޔާގެ އިތުރުން މުޅި މުބާރާތުގެ އެންމެ މޮޅު ކުޅުންތެރިޔާގެ މަގާމު ހާސިލުކުރީ އެޗްޑީސީގެ އިސްމާއިލް ސާޖިދު (ކުޑަ ކާއްޓޭ) އެވެ.
މުބާރާތުގެ އެންމެ މޮޅު ކޯޗަކަށް ހޮވުނީ އެޗްޑީސީގެ ހުސައިން ޝަރީފް (ނަލަ ހުސައިން) އެވެ. އެންމެ އުއްމީދީ ކުޅުންތެރިޔަކަށް ޕޮލިހުގެ ޝާމިލް މުހައްމަދު ހޮވުނުއިރު، އެންމެ މޮޅު ބިދޭސީ ކުޅުންތެރިއަކަށް ހޮވުނީ އެޗްޑީސީގެ ޒަންޓިމީރެވެ.