އައިޖީއެމްއެޗްގައި ނަރުހެއްގެ ގޮތުގައި މަސައްކަތްކުރި ފިލިޕީންސްގެ ރައްޔިތެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ ލިބޭ ހަލީމަތު ލަމްހާ ބަންދުން ދުކޮށްލަން ކޯޓުގައި އަނެއްކާވެސް އެދިއްޖެ އެވެ.
މޭރީގެ މަރުގެ މައްސަލައިގައި ދައުލަތުން ދައުވާކުރަނީ ލަމްހާގެ އިތުރުން އޭނާ އޭރު ރަށްޓެހިވެގެން އުޅުނު މޭރީގެ ފިރިމީހާ މާވިންގެ މައްޗަށެވެ.
މޭރީގެ މަރުގެ މައްސަލާގައި އުމުރުން 30 އަހަރުގެ މާވިން ހައްޔަރުކުރީ އޮކްޓޫބަރު 27، 2021 ގައެވެ. ލަމްހާ ހައްޔަރުކުރީ ނޮވެމްބަރު 16، 2021 ގައެވެ.
ލަމްހާ ބަންދުކުރި ފަހުން އޭނާ ދޫކޮށްލުމަށް ތަކުރާރުކޮށް ކްރިމިނަލް ކޯޓުގައި އެދެމުން ޝަރުތުތަކަކާ އެކު މިދިޔަ ނޮވެމްބަރު މަހު އޭނާ ދޫކޮށްލަން ކޯޓުން އަމުރުކުރި އެވެ. އެކަމަކު ދައުލަތުން އެ އަމުރު އިސްތިއުނާފް ކުރުމާ ގުޅިގެން ހައިކޯޓުން ވަނީ ދަށު ކޯޓުގެ އަމުރު ބާތިލްކޮށް އޭނާ އަލުން ބަންދުކުރުމަށް މިދިޔަ ޑިސެމްބަރު 20 ވަނަ ދުވަހު އަމުރުކޮށްފަ އެވެ.
ޝަރީއަތް ނިމެންދެން ބަންދުކޮށްފައި ހުރި ލަމްހާގެ ބަންދު މުރާޖައާ ކޮށްދިނުމަށް މިދިޔަ އޮކްޓޫބަރު މަހު ކްރިމިނަލް ކޯޓަށް އަނެއްކާވެސް ވަނީ ހުށަހަޅާފަ އެވެ.
ކްރިމިނަލް ކޯޓުގައި މިއަދު އޮތް އަޑުއެހުމެއްގައި ލަމްހާގެ ވަކީލް އަހްމަދު ޔާމީން ވިދާޅުވީ ލަމްހާ ދޫކޮށްލާފައި ހުއްޓާ ހައިކޯޓުން އޭނާ ބަންދުކުރަން އަމުރުކުރީ އޭރު ދަށު ކޯޓުގައި މައްސަލައާއި ގުޅޭ ހެކިބަސް ނަގަމުންދާތީ ޝަރީއަތް ދެން ލަސްވެގެން ނުދާނެ ކަމަށް ބެލުމަށްފަހު ކަމަށެވެ. ނަމަވެސް ކްރިމިނަލް ކޯޓުގެ ޝަރީއަތްތައް އެކަށީގެންވާ ގޮތަކަށް މިހާރު ކުރިއަށް ނުދާތީ މައްސަލަ ދިގުލައިގެން ދިއުމަކީ ލަމްހާގެ އެތައް ހައްގެއް ގެއްލިގެންދާ ކަމެއް ކަމަށްވާތީ އޭނާ ދޫކޮށްލުމަށް ވަކީލް އެދިވަޑައިގެންނެވި އެވެ.
ނަމަވެސް ދައުލަތުން ވަނީ ލަމްހާ ބަންދުން ދޫކޮށްލުމަށާްއި ގޭބަންދަށް ބަދަލުކުރުމަށްވެސް ދެކޮޅު ހަދާފަ އެވެ. ދައުލަތުގެ ވަކީލް ވިދާޅުވީ ލަމްހާގެ ބަންދުކޮށްފައި ހުރީ މުޖުތަމައުއަށް ނުރައްކާވާ ފަދަ ޖިނާއީ ބޮޑު ކުށެއް ޖަމާއަތް ހަދައިގެން ކުރުމުގެ ތުހުމަތުގައި ކަމަށެވެ. އެހެންވެ އެ ހާލަތް އަދިވެސް އެގޮތުގައި ދެމިއޮތުމާ ގުޅިގެން ލަމްހާ ދޫކޮށްލަން އެއްބަސްނުވެވޭ ކަމަށް ދައުލަތުން ބުންޏެވެ.
މާވިންގެ މައްޗަށް ދައުލަތުން އުފުލާފައިވަނީ އެނގިހުރެ މީހަކު މެރުމުގެ ދައުވާ އެވެ. ކުށް ސާބިތުވެއްޖެނަމަ އަސާސީ އަދަބެއްގެ ގޮތުން 10 އަހަރަށް ޖަލަށްލާނެ އެވެ. ނަމަވެސް ހުކުމް ކުރުމުގައި ގާޒީ ނިންމަވާ ގޮތްތަކެއްގެ ސަބަބުން ކުށުގެ އަދަބު ބޮޑުވުމަކީ އޮތް ފުރުސަތެކެވެ.
އުމުރުން 24 އަހަރުގެ ލަމްހާގެ މައްޗަށް ދައުލަތުން ތިން ދައުވާއެއް އުފުލާފައިވެ އެވެ. އެއީ އެނގިހުރެ މީހަކު މެރުމުގައި ބައިވެރިވުމުގެ ދައުވާ އާއި، އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރުހިންގުމުގެ ކުށުގެ ދައުވާގެ އިތުރުން ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ދައުވާ އެވެ.
ލަމްހާގެ ވަކީލާއި ދައުލަތުގެ ވާހަކަތަކަށްފަހު ލަމްހާ ދޫކޮށްލުމާ މެދު މާދަމާ ގޮތެއް ނިންމަވާނެ ކަމަށް މައްސަލަ ބެއްލެވި ގާޒީ
ހުސައިން ފާއިޒް ރަޝާދު ވިދާޅުވި އެވެ.