ޖަޕާންގައި ދިވެހި ސަފީރެއްގެ ގޮތުގައި ކުރިން ހުންނެވި އަހްމަދު ހަލީލަށް، ޖަޕާނު އެމްޕެރާ ދެއްވާ ހާއްސަ ޝަރަފެއް އަރުވައިފި އެވެ.
އެކި ދާއިރާތަކުން ފާހަގަކޮށްލެވޭ ހިދުމަތްތައް ކޮށްދޭ ފަރާތްތަކަށް ޖަޕާނުގެ އެމްޕެރާ ދެއްވާ ޝަރަފުގެ ތެރެއިން ހަލީލަށް އެރުވި ޝަރަފަކީ "އޯޑާ އޮފް ދަ ރައިސިން ސަން، ގޯލްޑް އެންޑް ސިލްވާ ސްޓާ" އެވެ.
ނިމިދިޔަ އެމްޑީޕީ ސަރުކާރުގައި ފޮރިން މިނިސްޓްރީގެ ކުރީގެ ސްޓޭޓް މިނިސްޓަރު ކަންވެސް ކުރެއްވެވި ހަލީލް ފިޔަވާ އިތުރު ބޭފުޅަކަށް މި ޝަރަފް މީގެކުރިން ލިބިފައެއް ނުވެ އެވެ.
ހަލީލަށް މި ޝަރަފު އެރުވީ ރާއްޖެއާއި ޖަޕާނާ ދެމެދު އޮތް ގުޅުން އިތުރަށް ބަދަހިކުރެއްވުމަށް ކުރެއްވި މަސައްކަތް ފާހަގަކުރެއްވުމުގެ ގޮތުންނެވެ.
ހާރިޖީ ދާއިރާގައި ހަލީލް މަސައްކަތް ކުރައްވާތާ މިހާރު 31 އަހަރު ވެއްޖެ އެވެ.
ރައީސް އިބްރާހީމް މުހައްމަދު ސޯލިހްގެ ސަރުކާރުގައި ވަނީ ހާރިޖީ ދާއިރާގައި ހަލީލް ކުރެއްވި މަސައްކަތުގެ އަގުވަޒަން ކުރެއްވުމުގެ ގޮތުން ހާރިޖީ ދާއިރާގެ ހިދުމަތުގެ އެންމެ މަތީ ޝަރަފުވެސް އަރުވާފަ އެވެ.