އެމެރިކާގެ އިންޓިޚާބީ ރައީސް ޑޮނަލްޑް ޓްރަމްޕް ފޮކްސް ނިއުސްއަށް ދެއްވި އިންޓަވިއުއެއްގައި -- އެމެރިކާގައި ކުރިއަށް އޭނާގެ ސަރުކާރުގައި އާއިލާގެ އެއްވެސް މެމްބަރަކު ބައިވެރިނުކުރައްވާނެ ކަމަށް ވިދާޅުވެއްޖެ އެވެ.
ޓްރަމްޕް ވިދާޅުވީ އޭނާގެ ސަރުކާރު ވާނީ ނަތީޖާ ނެރޭ އަދި ވަރަށް ސީރިއަސް ސަރުކާރެއް ކަމަށެވެ. ނަތީޖާ ނުނެރެވޭ ނަމަ މަގާމުތަކުގައި ވަޒީރުންނާއި ވެރިން ތިއްބެވުމުގެ ބޭނުމެއް ނެތް ކަމަށްވެސް އޭނާ ވިދާޅުވި އެވެ.
ޓްރަމްޕްގެ ބަސްމަގު ހުރި ގޮތުން ހީވަނީ މަގާމުގެ ޒިންމާތައް އަދާކުރެއްވުމުގައި، ޓްރަމްޕާ އެއްވަރަށް ވަޑައިނުގަނެވޭ ވެރިން ސަރުކާޜުން ވަކިކުރައްވާނެ ކަމެވެ.
އޭނާ މި ފަހަރު އެކުލަވާލާ ސަރުކާރުގައި އަމިއްލަ ދަރިއެއްގެ އިތުރުން ޅީދަރިއެއް، ދަނބިދަރިއެއް، ލިޔަނެއް އަދި ފަހަރިއެއް ވެސް ނުހުންނާނެ ކަމަށް ޓްރަމްޕް ވިދާޅުވި އެވެ.
ޑޮނަލްޑް ޓްރަމްޕް މިގެކުރި ވެސް ވަނީ އެމެރިކާގެ ރައީސްގެ މަގާމު އަދާކުރައްވާފަ އެވެ. އެމެރިކާގެ 45 ވަނަ ރައީސްގެ ގޮތުގައި 2017 – 2021 އަށް ވައިޓް ހައުސްގައި އޭނާ ވަނީ ސަރުކާރުގެ ޒިންމާތައް އަދާކުރައްވާފަ އެވެ.
ޓްރަމްޕް ވިދާޅުވީ އޭނާގެ ވެރިކަމުގައި އާއިލާއަށް ހެޔޮވަރުގެ ތަކުލީފުތައް ތަޖުރިބާކުރަން ޖެހުނު ކަމަށެވެ. ދަރިންނަށާއި ލިޔަން ފަހަރިންނަށް ނުފޫޒުފޯރުވައި ބިރުދައްކާފައިވާ ކަމަށްވެސް އޭނާ ވިދާޅުވި އެވެ.
ޓްރަމްޕްގެ ފުރަތަމަ ދައުރުގައި އޭނާގެ ދަރިކަނބަލުން އިވާންކާ އަދި ދަނބިދަރި ޖާޑް ކުޝްނާ ވަނީ ޓްރަމްޕްގެ މުޝީރުންގެ ގޮތުގައި މަސައްކަތްކުރައްވާފަ އެވެ.
ޓްރަމްޕް ވިދާޅުވީ އާއިލާ މެމްބަރުންގެ ބަދަލުގައި ސަރުކާރުން ބާރުގަދަ މަގާމުތައް އީލޮންމަސްކާއި ރޮބާޓް އެފް ކެނެޑީ ކަހަލަ، ޓްރަމްޕާ އެއްކޮޅަށް ވަކާލާތުކުރައްވާ ބޭފުޅުންނަށް ދެއްވާނެ ކަމަށެވެ.
މަސްކަށް ދެއްވާނެ ކަމަށް ޓްރަމްޕް ވިދާޅުވީ މަގާމަކީ ނުފޫޒުގަދަ އަދި މަސްކަށް ފެނިވަޑައިގެންފި ނަމަ ސަރުކާރުގެ ކޮންމެ ވެރިއަކު ވަކިކުރުމުގެ ބާރު އޮތް މަގާމަކަށް ވާނެ ކަމަށް ޓްރަމްޕް ވިދާޅުވި އެވެ.