އުމުރުން 13 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައިގައި ފިލައިގެން އުޅެނިކޮށް ހައްޔަރުކުރި މީހާ ކޯޓުން ދޫކޮށްލި މައްސަލަ އިސްތިއުނާފު ކޮށްފި އެވެ.
މި މައްސަލައިގެ ތުހުމަތުގައި ހައްޔަރުކޮށްފައި ބެހެއްޓުމަށްފަހު ކޯޓުން ދޫކޮށްލީ ނ. މިލަދޫ، މީޒާން، އަހްމަދު ވިއާމް (27އ) އެވެ.
އޭނާ ހައްޔަރުކޮށް ކޯޓަށް ހާޒިރުކުރުމުން އޭނާގެ ބަންދަށް 30 ދުވަސް ޖަހާފައިވާއިރު މައުލޫމާތު ލިބިފައިވާ ގޮތުގައި އެ މުއްދަތު ހަމަވުމުން ކޯޓުން މިހާރު ވަނީ އޭނާ ދޫކޮށްލާފަ އެވެ.
ވިއާމް ދޫކޮށްލީ އޭނާ ބަންދުގައި ބަހައްޓައިދިނުމަށް ފުލުހުން އެދިފައިވަނިކޮށް ކަމަށް އަވަސްއަށް އެނގިފައިވެ އެވެ. އެހެންވެ ވިއާމް ދޫކޮށްލި މައްސަލަ ދައުލަތުން ވަނީ ހައިކޯޓުގައި އިސްތިއުނާފް ކޮށްފަ އެވެ.
ވިއާމް ހައްޔަރުކުރިއިރު އޭނާ ފިލުމަށް އެހީތެރިވެ ދިން މީހަކުވެސް އޭރު ހައްޔަރުކުރި އެވެ.
ވިއާމްގެ ކުށުގެ ރެކޯޑެއް އޮންނަކަން އަދި މިހާތަނަށް އެނގިފައި ނުވި ނަމަވެސް އޭނާގެ މައްޗަށް މީގެ ހައެއްކަ އަހަރު ކުރިން ފައިސާގެ މައްސަލައެއްގައި ހުކުމެއް ކުރި ކަމަށް މައުލޫމާތު ލިބެ އެވެ.
އެނގިފައިވާ ގޮތުގައި އޭނާގެ މައްސަލަ ހައިކޯޓަށް ބަލައިގަނެ ޝަރީއަތް ފަށަން ވަނީ ތައްޔާރުވެފަ އެވެ.