އާބަން ސެންޓަރުތައް ކަނޑައެޅީ މެނިފެސްޓޯގައިވާ ގޮތަށް: ރައީސް

އާބަން ސެންޓަރުތަކުގެ ގޮތުގައި ތަރައްގީކުރާ ރަށްތަކާއި ނޮދަން އިންޓަގްރޭޓަޑް ޑިވެލޮޕްމަންޓް ޒޯނަކާއި ސަދަން އިންޓަގްރޭޓެޑް ޑިވެލޮޕްމަންޓް ޒޯނެއް ކަނޑައެޅި ކުރިން އިއުލާންކޮށްފައިވާ މެނިފެސްޓޯގައިވާ ގޮތަށް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒު މިކަން ސާފުކޮށްދެއްވާފައި މިވަނީ ހަތް އާބަން ސެންޓަރުގެ ގޮތުގައި ތަރައްގީކުރަން ނިންމާފައިވާ ރަށްތައް ކަނޑައަޅައި އިއުލާންކުރުމާ އެކު އަމާޒުވަމުންދާ ފާޑުކިޔުންތަކާ ގުޅިގެން އެކްސްގައި ކުރެއްވި ޕޯސްޓެއް ގައެވެ.

އާބަން ސެންޓަރުތަކުގެ ގޮތުގައި ތަރައްގީކުރާ ރަށްތައް

ރައީސް ވިދާޅުވީ އާބަން ސެންޓަރުތަކާއި ސަރަހައްދީ އިންޓަގްރޭޓެޑް ޒޯންތަކަކީ އެމަނިކުފާނު އެކުލަވާލައްވާފައިވާ މެނިފެސްޓޯގައި ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި ވިދާޅުވެފައި ރަށްތަކެއް ކަމަށެވެ.

ރައީސް ވިދާޅުވި ގޮތުގައި ނޮދަން އިންޓަގްރޭޓަޑް ޑިވެލޮޕްމަންޓް ޒޯންގައި ހިމެނެނީ ރާއްޖޭގެ އެންމެ އުތުރުގެ ތިން އަތޮޅު ކަމަށްވާ ހއ، ހދ، ށ. އަދި ނ. އަތޮޅެވެ. ސަދަން އިންޓަގްރޭޓެޑް ޑިވެލޮޕްމަންޓް ޒޯންގައި ހިމެނެނީ އެންމެ ދެކުނުގެ ހަތަރު އަތޮޅު ކަމަށްވާ ގއ، ގދ، ޏ އަދި އައްޑޫ ސިޓީ ކަމަށްވެސް ވިދާޅުވި އެވެ.

މީގެއިތުރުން ހަތް އާބަން ސެންޓަރުގެ ގޮތުގައި ތަރައްގީ ކުރަން ނިންމާފައިވާ ރަށްތަކަކީ މާލެ އިން އުތުރުން ތިން ރަށާއި މާލެ އިން ދެކުނުން ހަތަރު ރަށް ކަމަށްވެސް ރައީސް ވިދާޅުވި އެވެ.

އެމަނިކުފާނު ވިދާޅުވީ އާބަން ސެންޓަރުތަކާއި އިންޓަގްރޭޓަޑް ޑިވެލޮޕްމަންޓް ޒޯންތަކަކީ ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދްމަތްތައް ހިމެނޭހެން ސަރުކާރުގެ ސިޔާސަތުތަކުގެ ތެރެއިން ތަރައްގީކުރާ ތަންތަން ކަމަށެވެ.

ރައީސް ވިދާޅުވީ މިކަންކަމަކީ ކުރިއަށް އޮތް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓަޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި، ފަންނީ ފަރާތްތަކާއި، ކައުންސިލްތަކާއި، ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން ކަމަށެވެ.

"ކަންކަމުގެ ހަގީގަތް ނުބައްލަވާ ނުވަތަ ހަގީގަތް އެނގިވަޑައިގެން ތިއްބަވައިގެން ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާ ވާނީ އެކަންކަން ކުރައްވާ ބޭފުޅުން،" ފާޑުކިޔާ ފަރާތްތަކަށް ރައްދުދެއްވަމުން ރައީސް ވިދާޅުވި އެވެ.

އާބަން ސެންޓަރުތަކާއި އިންޓަގްރޭޓެޑް ޑިވެލޮޕްމަންޓް ޒޯންތައް ކަނޑައެޅި ގޮތުން އަމާޒުވަމުންދާ ފާޑުކިޔުންތަކާ ގުޅިގެން ހައުސިން މިނިސްޓްރީން އިންޓަގްރޭޓެޑް ޑިވެލޮޕްމަންޓް ޒޯންތައް ތަރައްގީ ކުރަނީ މިއަދު އިއުލާން ކުރި އާބަން ސެންޓަރުތަކުގެ އިތުރަށް ތަރައްގީކުރާ ތަންތަނުގެ ގޮތުގައި ކަމަށެވެ. ރައީސް މުއިއްޒުގެ އުމްރާނީ ތަސައްވުރަކީ ރާއްޖޭގެ އުތުރުގެ ހަތަރު އަތޮޅާއި ދެކުނުގެ ހަތަރު އަތޮޅު ހިމަނައިގެން އުމްރާނީ ތަރައްގީގެ ސަރަހައްދެއް ތަރައްގީ ކުރުމާއެކު އާބަން ސެންޓަރުތަކެއްވެސް ތަރައްގީކުރުން ކަމަށް މިނިސްޓްރީން ބުންޏެވެ.