އެމެރިކާގެ އިންތިޚާބީ ރައީސް، ޑޮނަލްޑް ޓްރަމްޕް ސަރުކާރާ ހަވާލުވެވަޑައިގަތުމުގެ ކުރިން ވަޒީރުންގެ މަޖިލީސް އެކުލަވާލައްވާނެ އެވެ.
ރިޕޯޓްތައް ބުނާ ގޮތުން ސަރުކާރު އެކުލަވާލުމަށްޓަކައި ކެބިނެޓަށް މެމްބަރުން ހޮވުމުގެ މަރުހަލާ މިހާރު ދަނީ ކުރިއަށެވެ.
ޓްރަމްޕްގެ ސަރުކާރުގައި ދިފާއީ ވަޒީރުގެ މަގާމަށް އައްޔަންކުރައްވާނެ ކަމަށް ބެލެވިފައި އޮތީ މައިކް ޕޮމްޕެއޯ އެވެ. ޓްރަމަޕްގެ ފުރަތަމަ ދައުރުގައި މައިކް ޕޮމްޕެއޯ އަދާކުރެއްވީ ސެކްރެޓަރީ އޮފް ސްޓޭޓްގެ މަގާމެވެ.
މި ޚަބަރު މި ގޮތަށް ނޫސްތަކުގައި ލިޔެފައި ވަނިކޮށް، ޓްރަމްޕާ ހަވާލާދީ ސާފު ޚަބަރުތަކެއް ވަނީ މީޑިއާއަށް ތިލަވެފަ އެވެ.
ރިޕޯޓްތައް ބުނާ ގޮތުން މައިކް ޕޮމްޕެއޯއަށް ޓްރަމްޕްގެ ދެވަނަ ދައުރުގައި -- ވަޒީރުންގެ މަޖިލީހުން ފުރުސަތު ދެއްވާ ގޮތަށް ހަމަޖެހިފައެއް ނުވެ އެވެ. އަދި ވައިޓް ހައުސްގެ ޓީމުގައި ވެސް ހިމެނިވަޑައިނުގަންނަވާނެ ކަމަށް ޚަބަރުތައް ބުނެ އެވެ.
ޓްރަމްޕް ސަރުކާރުން ނިކީ ހޭލީއަށް ވެސް ފުރުސަތުދެއްވާނެ ކަމަށް ރިޕޯޓްތަކުގައި ލިޔެފައިވަނިކޮށް، ވައިޓް ހައުސްގެ ޓީމުން އަދި ސަރުކާރުން ވެސް ފުރުސަތު ނުދެއްވާނެ ކަމަށް ޓްރަމްޕް ވަނީ ވިދާޅުވެފަ އެވެ.
ހޭލީ ކުރިން އަދާކުރެއްވި މަގާމުތަކުގެ ތެރޭގައި، ސައުތު ކެރޮލައިނާގެ ގަވަރުނަރު ކަމާއި އެމެރިކާއިން އދއަށް ކަނޑައަޅުއްވާފައި ހުންނަވާ ސަފީރުކަން ހިމެނެ އެވެ.
އެމެރިކާގައި ނިމިދިޔަ ރިޔާސީ އިންތިޚާބުގަައި ރިޕަބްލިކަން ކެނޑިޑޭޓުގެ ގޮތުގައި ޓްރަމްޕާ ވާދަކުރައްވަން ހޭލީ މަސައްކަތްތަކެއް ކުރެއްވި އެވެ. އަދި އެކަން ހުއްޓާލައްވައި ފަހުން ވަނީ ޓްރަމްޕަށް ބައިއަތު ހިއްޕަވާފަ އެވެ.
ރިޔާސީ އިންތިޚާބަށް ކުޑަތަން ވެފައި ވަނިކޮށް މައިކް ޕޮމްޕެއޯ އާއި ނިކީ ހޭލީ ޓްރަމްޕަށް ބައިއަތުހިއްޕެވި ނަމަވެސް، އޭގެ ކުރިން މި ދެ ބޭފުޅުން ވަނީ ޓްރަމްޕަށް ފާޑުވިދާޅުވެ ސިޔާސަތަށް ޖޯކުޖައްސަވާފަ އެވެ.
ރިޕޯޓްތައް ބުނާ ގޮތުން ޕޮމްޕެއޯއަށް ސަރުކާރުން ފުރުސަތުނުދެއްވުމަށް ޓްރަމްޕްގެ ދަރިކަލުން، ޑޮނަލްޑް ޓްރަމްޕް ޖޫނިއާ އަދި މަޝްހޫރު ނޫސްވެރިޔާ ޓަކާ ކާލްސަން ވަނީ ޓްރަމްޕަށް ދަންނަވާފަ އެވެ.