މަގޭސޯލާ ޕްރޮގްރާމުގެ ދަށުން 7 ކިލޯވޯޓުގެ ސޯލާ ސިސްޓަމްތައް ގޭބިސީތަކުގައި ހަރުކުރުމަށް އެދުމުގެ ފުރުސަތު އަންނަ އަހަރު ހުޅުވާލާނެ ކަމަށް އެންވަޔަރަންމަންޓް މިނިސްޓްރީން ބުނެފި އެވެ.
ދައުލަތުގެ މީޑިއާގައި ވާހަކަ ދައްކަވަމުން އެންވަޔަރަންމަންޓް މިނިސްޓްރީގެ ސްޓޭޓްް މިނިސްޓަރު ޑރ. މުއާވިޔަތު މުހައްމަދު ވިދާޅުވީ މަގޭސޯލާ ޕްރޮގްރަމްގެ ދަށުން މިހާރު ފުރުސަތު ހުޅުވާލާފައިވަނީ 3 ކިލޯވޯޓާއި 5 ކިލޯވޯޓުގެ ސޯލާ ސިސްޓަމް ތަކަށް ކަމަށެވެ. މި ސިސްޓަމްތައް 748 ގޭބިސީއެއްގައި ހަރުކޮށްދޭން ހަމަޖެހިފައިވެ އެވެ.
"މީގެ އިތުރުން 7 ކިލޯވޯޓުގެ ސޯލާ ސިސްޓަމްތަކަށް ހުށަހެޅުމުގެ ފުރުސަތުވެސް އަންނަ އަހަރު ލިބޭނެ،" މުއާވިޔަތު ވިދާޅުވި އެވެ.
އޭނާ ވިދާޅުވީ ސޯލާއަށް އެދިފައިވާ ގެތަކުގައި މިއަހަރު ތެރޭގައި ސިސްޓަމުތައް ޖަހައިދޭނެ ކަމަށާއި އަދި ރަށްރަށުގައި ބެޓެރީ ސިސްޓަމްތައް ގާއިމުކުރުމުގެ މަސައްކަތްވެސް ކުރަމުންދާ ކަމަށެވެ.
މުއާވިޔަތު އިތުރަށް ވިދާޅުވި ގޮތުގައި މިއަހަރުގެ ތެރޭގައި އެކަނި ރާއްޖޭގައި ސޯލާ އިން ހަކަތަ އުފައްދާ މިންވަރު 53 މެގަވޮޓުން 68 މެގަވޮޓަށް ވަނީ އިތުރުކުރެވިފަ އެވެ. މިއީ ގާތްގަނޑަކަށް ދެ ޕަސަންޓުގެ އިތުރުވުމެކެވެ.
މަގޭ ސޯލަ ޕްރޮގްރާމަކީ ރާއްޖޭގައި ބޭނުންކުރާ ކަރަންޓުގެ 33 ޕަސަންޓަކީ އިއާދަކުރަނިވި ހަކަތައިގެ ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމަށް ކަނޑައަޅާފައިވާ އަމާޒަށް ދިއުމަށްޓަކައި ފަށާފައިވާ މަޝްރޫއެކެވެ.