ސެން ފްރެންސިސްކޯ ބޭ އޭރިއާގައި ކުރިއަށްދާ ހަވަނަ ކެރަމް ވޯލްޑް ކަޕްގެ ޓީމު އިވެންޓުން ދިވެހިރާއްޖޭގެ ފިރިހެން އަދި އަންހެން ޓީމުން ލޯ މެޑެލް ހާސިލްކޮށްފި އެވެ.
ފިރިހެން ޓީމުން ލޯ މެޑެލް ހޯދީ ސިންގަޕޫރާ ވާދަކޮށްގެންނެވެ.
މި މެޗުގައި އިސްމާއީލް އަޒުމީން ސިންގަޕޫރުގެ ވިޖޭ އަތުން މޮޅުވިއިރު މުންތަސިރު ސިންގަޕޫރުގެ ލެނަސް އަތުން މޮޅުވި އެވެ. އަދި ޑަބަލްސް މެޗުން ނާޒިމާއި ހުޖާންގެ ޕެއާ ވެސް މޮޅުވި އެވެ. މިއީ ކެރަމް ވޯލްޑް ކަޕްގެ ތާރީހުގައި ދިވެހި ފިރިހެން ޓީމަކުން ހޯދި ފުރަތަމަ މެޑަލް އެވެ.
އަންހެން ޓީމުން ލޯ މެޑެލް ހޯދީ އެމެރިކާއާ ވާދަކޮށްގެންނެވެ. އަންހެން ޓީމުގެ ސިންގަލްސް މެޗުގައި ވިދާދު އެމެރިކާގެ ސްވަޕޫރާ އަތުން މޮޅުވި އެވެ. އެހެންނަމަވެސް ރަޔާނާ އެމެރިކާގެ ޕްރީތީ އަތުން ބަލިވި އެވެ. މެޗުގެ ނަތީޖާ ކަނޑައެޅުނީ ޑަބަލްސް މެޗުން ނަހުފާއާއި ފައިނާޒްގެ ޕެއާ މޮޅުވުމާ އެކުގަ އެވެ.
މިދިޔަ އޭޕްރީލް މަހު މާލޭގައި ބޭއްވި ހަވަނަ އޭޝިއަން ކެރަމް ޗެމްޕިއަންޝިޕްގައިވެސް އަންހެން ޓީމުން ލޯ މެޑެލް ހޯދިއިރު، ފިރިހެން ޓީމުން ރިހި މެޑެލް ހޯދާފައިވެ އެވެ.
މިހާރު ކުރިއަށްދާ ކެރަމް ވޯލްޑް ކަޕްގައި އޯޕަން ސިންގަލްސް، އޯޕަން ޑަބަލްސް، ޓީމު އިވެންޓް އަދި ސްވިސް އިވެންޓްގެ އިތުރުން ޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ހަމަޖެހިފައިވެ އެވެ.