ކުރިއަށް އޮތް ރިޔާސީ އިންތިހާބުގައި ވާދަކުރެއްވުމާ ގުޅޭ ގޮތުން ކުރީގެ ރައީސް އިބްރާހީމް މުހައްމަދު ސޯލިހް ސާފު ޖަވާބެއް ނުދެއްވި އެވެ.
ރައީސް ޑރ. މުހައްމަދު މުއިއްޒުގެ ސަރުކާރަށް މިއަދު އެއް އަހަރު ފުރުމާ ގުޅިގެން ރައީސް ސޯލިހް ވަނީ ރާއްޖެ ޓީވީގެ "ފަށާއިރު" ޕްރޮގްރާމުގައި ބައިވެރިވެވަޑައިގެން މިސަރުކާރާ މެދު އެމަނިކުފާނު ދެކެވަޑައިގަންނަވާ ގޮތާއި އަދި އެމަނިކުފާނުގެ ސިޔާސީ ހަޔާތްޕުޅާ ގުޅޭގޮތުން ވާހަކަދައްކަވާފަ އެވެ.
ރިޔާސީ އިންތިހާބުގައި ވާދަކުރެއްވުމަށް ޝައުގުވެރިކަން އެބަހުރިތޯ ޕްރެޒެންޓަރު ސުވާލުކުރެއްވުމުން ރައީސް ސޯލިހް ވިދާޅުވީ އެމަނިކުފާނުގެ ސިޔާސީ ކުރިމަގު އޮތް ގޮތް އެމްޑީޕީގެ އިސް ބޭފުޅުންނަށާއި އެމަނިކުފާނުގެ އާއިލީ ބޭފުޅުންނަށް "ޝައްކެއް ނެތް މިންވަރަށް" އެނގިވަޑައިގަންނަވާ ކަމަށެވެ.
"އަޅުގަނޑު މިކަމުގައި ގެންގުޅޭ ވިސްނުން ފަހުން ހާމަކުރާނަން،" ސޯލިހް ވިދާޅުވި އެވެ.
ރައީސް ސޯލިހް ވިދާޅުވީ އެމްޑީޕީގެ ޓިކެޓްގައި ރިޔާސީ އިންތިހާބުގައި ވާދަކުރުމަށް ޝައުގުވެރިވާ ހަތަރު ފަސް ބޭފުޅަކު އުޅުއްވާ ކަމަށެވެ. ނަމަވެސް އެ ބޭފުޅުންގެ ނަންތައް ހާމަކުރައްވާފައެއް ނުވެ އެވެ.
ރައީސް ސޯލިހް ވިދާޅުވީ ވާދަވެރި ޕްރައިމަރީއެއްގައި ވާދަކުރަން ބަޔަކު ތިބުމަކީ ވަރަށް ރަނގަޅު ކަމެއް ކަމަށެވެ. އަދި ޝައުގުވެރިކަން ހުރި ބޭފުޅުން އެކަމުގައި ކުރިއަށް ވަޑައިގަތުމަށްވެސް އެމަނިކުފާނު އެދިވަޑައިގެންނެވި އެވެ.
ގައުމު މިއަދު އޮތް ހާލަތުން ކުރިއަށް އޮތް ރިޔާސީ އިންތިހާބުގެ ކުރިންވެސް ވަރަށް ގިނަ މަސައްކަތްތައް ކުރަން ހުރިކަން ފާހަގަކުރައްވަމުން ރައީސް ސޯލިހް ވިދާޅުވީ ރިޔާސީ ޕްރައިމަރީއަށް ޝައުގުވެރިވާ ބޭފުޅުންވެސް ޕާޓީގެ ހިންގުމުގައި ބައިވެރިވުން މުހިއްމު ކަމަށެވެ.
"އަޅުގަނޑު އޮންނާނީ ދަންނަވާފައި ހުރިހާ ބޭފުޅުންނަށް ކުރިއަށް ވަޑައިގަންނަވަން،" އެމަނިކުފާނު ވިދާޅުވި އެވެ.
ރައީސް ސޯލިހް ވިދާޅުވީ އެމަނިކުފާނު ރިޔާސީ އިންތިހާބުގައި ވާދަކުރެއްވުމާ މެދު ނިންމަވާ ގޮތެއް މިހާރު ހާމަކުރެއްވުމަކީ އެކަމުން ޕާޓީއަށް ލިބޭ ފައިދާއަށް ވުރެ ލިބޭ ގެއްލުމަކަށް ވެދާނެ ކަމަށެވެ. އެކަމަކު އެމަނިކުފާނު ނިންމަވަންޖެހޭ ނިންމެވުން އެންމެ ރަނގަޅު ވަގުތު ހާމަކުރައްވާނެ ކަމަށްވެސް ވިދާޅުވި އެވެ.
އެމްޑީޕީއަށް ވެރިކަން ލިބެން އޮތް ހުރަހަކަށް އެމަނިކުފާނު ނުވާނެ ކަމުގެ ޔަގީންކަންވެސް ރައީސް ސޯލިހް ވަނީ ދެއްވާފަ އެވެ.
ކުރިއަށް އޮތް ރިޔާސީ އިންތިހާބުގައި ވާދަކުރައްވާނެ ކަމަށް މިހާތަނަށް ސާފުކޮށް އަދި ވިދާޅުވީ ކުރީގެ ރައީސް އަބްދުﷲ ޔާމީން އެވެ.