އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ، މޭރީ ގްރޭސް އޮނެޑް ޕިނެޑާގެ މަރުގެ ތުހުމަތު ކުރެވޭ، ހަލީމަތު ލަމްހާ އަބްދުއްރަހްމާން ބަންދުން ދޫކޮށްލި މައްސަލަ ދައުލަތުން ހައިކޯޓުގައި އިސްތިއުނާފުކޮށްފި އެވެ.
މޭރީގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައި ހުރި ލަމްހާ، ބަންދުން ދޫކޮށްލަން ކްރިމިނަލް ކޯޓުން ނިންމީ މިދިޔަ ހަފްތާ ގައެވެ.
ހައިކޯޓުގެ ރަޖިސްޓްރީން ދައްކާ ގޮތުން އެ މައްސަލަ ޕީޖީ އޮފީހުން ހައިކޯޓަށް ހުށަހެޅީ މިދިޔަ ބުރާސްފަތި ދުވަހު އެވެ.
އެ މައްސަލަ ހައިކޯޓަށް ބަލައިގަތުމާމެދު އަދި ވަކި ގޮތެއް ނިންމާފައިވާ ކަމުގެ މައުލޫމާތެއް ލިބިފައެއް ނެތެވެ.
ލަމްހާ ބަންދުން ދޫކޮށްލީ ކްރިމިނަލް ކޯޓުގެ ގާޒީ ހުސައިން ފާއިޒު ރަޝާދު އެވެ.
ގާޒީ ވިދާޅުވީ ދައުލަތުގެ ގިނަ ހެކިންތަކެއްގެ ހެކިބަސް ނަގާފައިވާތީ އާއި ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުސަތު ކުޑަ ހެކިތަކަކަށް ވާތީ ލަމްހާ ދޫކޮށްލުމަށް ނިންމެވީ ކަމަށެވެ.
ލަމްހާ ދޫކޮށްލާފައި ވަނީ ހަ ޝަރުތެއް ކުރުމަށްފަހު އެވެ. އެގޮތުން އޭނާ ރާއްޖެއިން ފުރައިގެން ނުދިއުމަށާއި، ގާނޫނާ ހިލާފު އަމަލެއް ނުކުރުމަށާއި، ކޯޓަށް ގަޑިއަށް ހާޒިރުވުމަށާއި، ޒަރޫރީ ބޭނުމެއްގައި ނޫނީ ގެއިން ބޭރަށް ނުދިއުމަށާއި، މައްސަލައިގެ ހެކިންނާއި މޭރީގެ އާއިލާއާ ބައްދަލު ނުކުރުމަށާއި، ވަކި ގަޑިތަކެއްގައި ގޭގައި ހުރުމަށް އަމުރުކޮށްފައި ވެއެވެ.
ކުރިންވެސް އެއް ފަހަރު ލަމްހާ ބަންދުން ދޫކޮށްލުމުން ދައުލަތުން ހައިކޯޓުގައި މައްސަލަ އިސްތިއުނާފުކޮށް އަލުން ލަމްހާ އޭރު ހައްޔަރު ކުރި އެވެ.