ދައުލަތުގެ ބަޖެޓްގެ ބަހުސް މިއަދު ނިންމުމަށް ގަސްދުކުރައްވާ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
މަޖިލީހުގެ ޖަލްސާގައި އަބްދުއްރަހީމް ވަނީ ބަޖެޓް ބަހުސްގައި ބައިވެރިވާން ބޭނުންވާ މެންބަރުން މިއަދު 9:30 ގެ ކުރިން ބަހުސްގައި ބައިވެރިވުމަށް އެދުމަށް އެދިވަޑައިގެންފަ އެވެ.
"9:30 އާ ހަމައަށް އެދިވަޑައިގަންނަވާ ބޭފުޅުންނަށް ފުރުސަތު ދީ ނިމެންދެން އަޅުގަނޑު ބަހުސް ކުރިއަށް ގެންދާނަން. މިއަދު ބަހުސް ނިންމުމަށް އަޅުގަނޑު ގަސްދުކުރާ ވާހަކަވެސް މެންބަރުންގެ މައުލޫމާތަށްޓަކައި ދަންނަވާލަން،" އަބްދުއްރަހީމް ވިދާޅުވި އެވެ.
ފިނޭންސް މިނިސްޓްރީން އަންނަ އަހަރަށް ލަފާކޮށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ. މަޖިލީހަށް ބަޖެޓް ހުށަހަޅާފައިވަނީ މިދިޔަ މަހުގެ 31 ވަނަ ދުވަހު އެވެ.
ބަޖެޓްގެ ހަރަދު 49.2 ބިލިއަން ރުފިޔާއަށް އަރާނެ ކަމަށް ލަފާކޮށްފައިވާއިރު އޭގެ ތެރެއިން 35.9 ބިލިއަން ރުފިޔާއަކީ ރިކަރަންޓް ހަރަދެވެ. 13.3 ބިލިއަން ރުފިޔާއަކީ ކެޕިޓަލް ހަރަދެވެ.
ޓެކްސް އާމްދަނީގެ ގޮތުގައި އަންނަ އަހަރު 29.2 ބިލިއަން ރުފިޔާ ޓެކްސް ނޫން އާމްދަނީގެ ގޮތުގައި އަށް ބިލިއަން އަދި ހިލޭ އެހީގެ ގޮތުގައި އަންނަ އަހަރު 2.6 ބިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފަ އެވެ.