ކުރީ ސަރުކާރުގައި ކޮންސްޓްރަކްޝަން މިނިސްޓްރީގައި އެކަނިވެސް 39 ބިލިއަން ރުފިޔާގެ މަޝްރޫއު ސޮއިކޮށްފައި އެބަހުރި ކަމަށް މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު މުއްތަލިބް ވަނީ އެއީ ދައުލަތުގެ އެއްވެސް ބަޖެޓަކުން ކުރެވޭ އަދަދެއްގެ މަސައްކަތްތަކެއް ނޫން ކަމަށް ވިދާޅުވެފަ އެވެ.
"39 ބިލިއަން ރުފިޔާ އަޅުގަނޑުމެންނަށް އާމްދަނީގެ ގޮތުގައިވެސް ނުލިބޭ އަހަރެއްގެ ތެރޭގައި،" މުއްތަލިބް ވިދާޅުވި އެވެ.
މިނިސްޓަރު ވަނީ 2023 ވަނަ އަހަރު ވަރަށް ގިނަ މަޝްރޫއުގައި ސޮއިކޮށް ފަށާފައިވާކަން ފާހަގަކުރައްވާފަ އެވެ. ނަމަވެސް އެއީ ދައުލަތުގެ ބަޖެޓެއްގެ ތެރެއިން ހަރަދު ކުރެވޭނެ ވަރުގެ އަދަދެއް ނޫން ކަމަށް ވިދާޅުވި އެވެ.
މުއްތަލިބް ވިދާޅުވި ގޮތުގައި 2023 ވަނަ އަހަރުގެ ބަޖެޓުގައި ކޮންމެ ރަށަކަށް "އެތިކޮޅެއް" ދޭ ގޮތަށެވެ. އެގޮތަށް އަދަދުތައް ޖެހުމުން މަޝްރޫއުތައް ކުރިއަށް ނުދާނެ ކަމަށް މިނިސްޓަރު ވިދާޅުވި އެވެ.
"2025 ވަނަ އަހަރުގެ ބަޖެޓު އަޅުގަނޑުމެން ހަދާފަ އެ އޮތީ މި ދެންނެވި ގޮތަށް އެންވެލޮޕެއްގެ ތެރެއިން މަޝްރޫއުތައް ކުރިއަށް ގެންދެވޭ ގޮތަށް އެހެންވީމަ އަޅުގަނޑުމެންނަށް ކުރިއަށްގެންދަން ފުރުސަތު ލިބޭވަރަކަށް ހުރިހާ މަޝްރޫއެއްވެސް ކުރިއަށް ގެންދާ ގޮތަށް،" މިނިސްޓަރު މުއްތަލިބް ވިދާޅުވި އެވެ.
ދައުލަތުގެ އަންނަ އަހަރުގެ ބަޖެޓުގެ ގޮތުގައި މިދިޔަ އޮކްޓޫބަރު 31 ވަނަ ދުވަހު ރައްޔިތުންގެ މަޖިލީހަށް ހުށަހަޅާފައިވަނީ 56.6 ބިލިއަން ރުފިޔާގެ ބަޖެޓެކެވެ.