ފިނޭންސް މިނިސްޓްރީން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހެޅި ދައުލަތުގެ ބަޖެޓްގެ ތަފުސީލް ނުދެއްވަނީސް ބަޖެޓަށް ވޯޓު ނުދެއްވާނެ ކަމަށް އެމްޑީއޭގެ ލީޑަރު އަދި މީދޫ ދާއިރާގެ މެންބަރު އަހުމަދު ސިޔާމް މުހައްމަދު މިއަދު ވިދާޅުވެއްޖެ އެވެ.
ބަޖެޓް ބަހުސްގައި ސިޔާމް ވިދާޅުވީ ބަޖެޓެއް ހުށަހަޅާއިރު ތަފްސީލް އެނގެންޖެހޭނެ ކަމަށާއި މިއީ މަޖިލީހުގައި ހޭދަކުރެއްވި 21 އަހަރުގެ ތެރޭގައި ތަފްސީލެއް ނެތި ހުށަހެޅުނު ފުރަތަމަ ބަޖެޓް ކަމަށެވެ.
ސިޔާމް ވަނީ ބަޖެޓްގައި ރަށްރަށުގައި ވަކިވަކިން ހިންގާ ތަރައްގީގެ މަޝްރޫއުތަކުގެ ތަފްސީލް ނެތް ކަމަށް ވިދާޅުވެފަ އެވެ.
"އަޅުގަނޑުމެންނަށް ވާނުވާއެއް ނޭނގި މި ބަޖެޓަށް ބަހުސް ކުރެވޭނެ އެއްވެސް ގޮތެއް އަޅުގަނޑުގެ ހިތަކަށް އަޅުގަނޑުގެ ސިކުނޑިއަކަށް ނުވިސްނޭ އިއްޒަތްތެރި ރައީސް. މިއީކީ ދުނިޔޭގެ އެއްވެސް ގައުމަކުން ބަޖެޓެއް ހުށަހަޅާނެ ގޮތެއް ނޫން،" ސިޔާމް ވިދާޅުވި އެވެ.
މި ބަޖެޓަކީ ވިޔަފާރި އާއި ޑިމޮކްރަސީ އަދި ޓްރާންސްޕޭރަންސީއާ ވަރަށް ދުރު ވިސްނުމެއްގައި ހުށަހަޅުއްވާފައިވާ ބަޖެޓެއް ކަމަށް ދެކިވަޑައިގަންނަވާ ކަމަށްވެސް ސިޔާމް ވިދާޅުވި އެވެ.
ސިޔާމް ވިދާޅުވީ ފޮރިން މިނިސްޓްރީއަށް މިއަހަރުގެ ބަޖެޓުގައި ހުށަހެޅި އަދަދަށްވުރެ އަންނަ އަހަރު ހިމެނި އަދަދު 40 ޕަސެންޓް އިތުރު ކަމަށް ވިދާޅުވެފަ އެވެ.
"ސިންގަޕޫރުގައި ހުންނަ އެމްބަސީއަށް ހަރަދުކުރަން އެތައް ސަތޭކަ މިލިއަން ރުފިޔާއެއް. މިހެން ގޮސް ބެންކޮކްގައި ހުންނަ އެމްބަސީއަށް ހަރަދުކުރަން އެތައް ސަތޭކަ ރުފިޔާއެއް. ދުބާއީއަށް އެތައް ސަތޭކަ ރުފިޔާއެއް. ދުނިޔޭގެ އެކި ގައުމުތަކުގައި އެމްބަސީތައް ހުޅުވާފައި ވާކަމެއް ހަރާން،" ސިޔާމް ވިދާޅުވި އެވެ.
ސިޔާމް ވަނީ ސިންގަޕޫރާއި ތައިލެންޑުން ރާއްޖެއަށް ލިބެނީ ކޮން އެހީއެއްތޯ ސުވާލުކުރައްވާފަ އެވެ. އެމްބަސީތައް ހުޅުވަނީ ފައިދާ ހޯދުމަށް ކަމަށާއި އެމްބަސީތަކަށް ކުރާ ހަރަދު ކުޑަކުރުމަށް ސިޔާމް ގޮވާލެއްވި އެވެ.
ބަޖެޓް ބަހުސްގައި ސިންގަޕޫރު އެމްބަސީއާ ގުޅޭ ގޮތުން ސިޔާމް ވާހަކަ ދެއްކެވިއިރު ވިޔަފާރީގެ އެކި ކަންކަމުގައި ސިޔާމް ވަރަށް ގިނައިން އެ ގައުމަށް ވަޑައިގަންނަވަ އެވެ. ނަމަވެސް ރާއްޖެއަށް އެހީ ނުދޭ ގައުމުތަކުގެ ލިސްޓުގައި ސިންގަޕޫރު ފާހަގަކުރެއްވީ ކީއްވެ ކަމެއް ނޭނގެ އެވެ.
"އަޅުގަނޑު މިއަދު ގޮވާލަން މި އެމްބަސީތައް ވަގުތުން ވަގުތަށް 50 ޕަސެންޓް މަދުކުރަން. 40 ޕަސެންޓް އިތުރުކުރުމުގެ ބަދަލުގައި 50 ޕަސެންޓް ކުޑަކުރަން. ހަރަދު ކުޑަކުރަން ޖެހިއްޖެ މިއަދު،" ސިޔާމް ވިދާޅުވި އެވެ.
ސިޔާމް ވަނީ ބަޖެޓް ފޮތުގައި ތަފްސީލް ހިމަނުއްވާ އިސްލާހުކޮށް އަލުން ހުށަހެޅުއްވުމަށްވެސް އެދިވަޑައިގެންފަ އެވެ.
"އަޅުގަނޑު ހަމަ އާދޭހާއެކު ދަންނަވަން އިއްޒަތްތެރި ރައީސް. މި ބަޖެޓް ގެންދަވާށޭ. ގެންގޮސް އަޅުގަނޑުމެންނަށް ތަންދޮރު އެނގޭނެ ގޮތަކަށް ބަޖެޓް ހުށަހަޅުއްވާ ދެއްވާ. އެހެން ނޫނީ އަޅުގަނޑު ދާއިރާގެ ރައްޔިތުން ބޭނުމެއް ނުވޭ މި ބަޖެޓަށް ވޯޓު ދޭކަށެއް،" ސިޔާމް ވިދާޅުވި އެވެ.
ބަޖެޓް ބަހުސްގައި ސިޔާމް ވަނީ ރަށްރަށުގެ މަޝްރޫއުތައް ހުއްޓިފައިވާ ކަމަށްވެސް ވިދާޅުވެފަ އެވެ.
"މި ބަޖެޓް ފޮތް ގެންދަވާ. ގެންގޮސް އަލުން ގެންނަވާ. ގެންނެވީމާ އަޅުގަނޑުމެން މިކަމާ ބެހޭ ގޮތުން ހަމަ ރަނގަޅަށް ވާހަކަ ދައްކާނަން. އެކަމަކު މި ބަޖެޓަކަށް މިގޮތަކަށް އޮއްވާ އަޅުގަނޑަކަށް މިއަކަށް ވޯޓެއް ނުދެވޭނެ،" ސިޔާމް ވިދާޅުވި އެވެ.