ދައުލަތުގެ ބަޖެޓުގައި ކުޑަ އަދަދެއް ޖަހައިގެން މަޝްރޫއުތައް ފެށުމުން ގިނަ މަޝްރޫއުތައް ހުންނަނީ ކުރިއަށް ނުގޮސް ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި ކުރިއަށްދާ ބަޖެޓް ބަހުސްގައި މިނިސްޓަރު މޫސާ ޒަމީރު ވިދާޅުވީ މަޝްރޫއުތަކުގެ ލިސްޓެއް ތައްޔާރުކޮށް ކުޑަ އަދަދެއް ޖަހައިގެން މަޝްރޫއުތައް ފެށުމުން އެ މަޝްރޫއުތައް ކުރިއަށްނުދާ ކަމަށެވެ.
"ކުޑަ އަދަދެއް ޖަހައިގެން ޕްރޮޖެކްޓްތައް ފެށީމަ ދެން އެތައް ބައިވަރު ޕްރޮޖެކްޓެއް މި ހުންނަނީ ޕައިޕްލައިންގައި ކުރިއަށް ނުގޮސް،" މިނިސްޓަރު ޒަމީރު ވިދާޅުވި އެވެ.
މަޝްރޫއުތައް ހުއްޓޭ ސަބަބުތަކުގެ ތެރޭގައި ބަޖެޓް ނެތުމާއި ކޭޝްފްލޯ ނެތުން ހިމެނޭކަން މިނިސްޓަރު ފާހަގަ ކުރެއްވި އެވެ. އެއް ކުންފުންޏަކަށް ގިނަ މަޝްރޫއުތަކެއް ހަވާލުކުރުމުން އެ މަޝްރޫއުތަކަށް ފައިނޭންސް ކުރެވޭނެ ގޮތް ނޯންނަ ކަމަށްވެސް މިނިސްޓަރު ވިދާޅުވި އެވެ.
"އަޅުގަނޑުމެންނަށް ފެނިގެންދިޔަ އަހަރުތަކެއް ކުރިން އެމްޓީސީސީއަށްވެސް ކޮންމެ ދުވަހަކު ޕްރޮޖެކްޓެއް ހަވާލުކުރަމުން ނިމިގެންދިޔައިރު އެމްޓީސީސީގެ ޕައިޕްލައިންގައި އެބައުޅޭ ގާތްގަނޑަކަށް 18 ބިލިއަން ރުފިޔާގެ (މަޝްރޫއު) އެއަށް ފައިނޭންސް ކުރެވޭނެ ގޮތެއް ނެތި،" ޒަމީރު ވިދާޅުވި އެވެ.
މިނިސްޓަރު ޒަމީރު ވިދާޅުވި ގޮތުގައި އަންނަ އަހަރު މަޝްރޫއުތައް ކުރިއަށް ގެންދާނީ އެކަމަށް ފަންޑް ހަމަޖެއްސުމަށްފަހު ރައީސުލްޖުމްހޫރިއްޔާގެ ޕްރައޯރަޓައިޒް ލިސްޓުގެ ތެރެއިންނެވެ. އެ ލިސްޓުގައި އެއްވެސް ރަށެއް އުނިވެފައި ނޯންނާނެ ކަމަށްވެސް ޒަމީރު ވިދާޅުވި އެވެ.
"މިފަހަރުގެ ޕްރޮޖެކްޓުތައް އަޅުގަނޑުމެން މި ޕްރައޯރަޓައިޒްކޮށް ވިސްނާާފައި މި އޮތީ ޕްރޮޖެކްޓުގެ ޕްރޮޕަރައިޓަރީ ފަންޑު އެލޮކޭޓްކޮށް ހަދާފައި ރައީސުލްޖުމްހޫރިއްޔާގެ ޕްރައޯރަޓައިޒް ލިސްޓުގެ ތެރެއިން ޕްރޮޖެކްޓުތައް ކުރިއަށްގެންދަން. އަޅުގަނޑު ދޭން އޮތް ޔަގީންކަމަކީ މިހާރު އަޅުގަނޑުމެން ގެންގުޅޭ ލިސްޓުގައިވެސް އެއްވެސް ރަށެއް އުނިވެފައި ނޯންނާނެ،" މިނިސްޓަރު ވިދާޅުވި އެވެ.
ބަޖެޓް ހަމަޖެހޭ މިންވަރުން މަޝްރޫއުތައް އިއުލާނު ކުރައްވާނެ ކަމަށްވެސް މިނިސްޓަރު ވިދާޅުވި އެވެ.