މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓް އުވާލައި، އެ މިނިސްޓްރީގެ ބައެއް މަސައްކަތްތައް އެހެން މިނިސްޓްރީތަކުގެ ދަށަށް ބަދަލުކޮށް އައްޔަންކުރެއްވި ވަޒީރުންނަށް ރުހުން ހޯދުމަށް ރައްޔިތުންގެ މަޖިލީހަށް ހުށަހަޅުއްވައިފި އެވެ.
ރައްޔިތުންގެ މަޖިލީހުގެ ދައުރުން ބޭރުގައި މިއަދު ބޭއްވި ޖަލްސާގައި ވަނީ މި މައްސަލަ ދިރާސާކުރަން ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވާފަ އެވެ.
ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީ އުވާލައި، އެ މިނިސްޓްރީގެ ބައެއް މަސައްކަތްތައް އެހެން މިނިސްޓްރީތަކުގެ ދަށަށް ބަދަލުކޮށް އެ މިނިސްޓްރީތަކުގެ ޕޯޓްފޯލިއޯތަކަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބަދަލުތކެއް ގެންނެވީ މިދިޔަ ޑިސެމްބަރު މަހުގެ 26 ވަނަ ދުވަހު އެވެ.
އެގޮތުން ހައުސިން މިނިސްޓްރީން ކުރަމުންދިޔަ ޕްލޭނިންގެ މަސައްކަތްތައް ފިނޭންސް މިނިސްޓްރީގެ ދަށަށް ބަދަލުކޮށް، ފިނޭންސް މިނިސްޓްރީގެ ނަން ވަނީ މިނިސްޓްރީ އޮފް ފިނޭންސް އެންޑް ޕްލޭނިންއަށް ބަދަލުކޮށްފަ އެވެ. އެ މިނިސްޓްރީގެ ވަޒީރަކީ މިހާރުވެސް އެ މަގާމުގައި ހުންނެވި މޫސާ ޒަމީރު އެވެ.
ހައުސިން އާއި އިންފްރާސްޓްރަކްޗާ އެއްކޮށްލުމަށްފަހު އެ މިނިސްޓްރީގެ ނަން ވަނީ މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާގެ ނަމަށް ބަދަލުކޮށްފަ އެވެ. އެ މިނިސްޓްރީގެ ވަޒީރަކީ ޑރ. އަބްދުﷲ މުއްތަލިބް އެވެ.
ކުރިން ހައުސިން މިނިސްޓަރަކަށް ހުންނެވި ޑރ. އަލީ ހައިދަރު އަހްމަދު އައްޔަންކުރައްވާފައިވަނީ މިނިސްޓްރީ އޮފް ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓަށެވެ.
ހަޔާ އެޑިޔުކޭޝަން މިނިސްޓަރަކަށް ކުރިން ހުންނެވި ޑރ. މަރިޔަމް މާރިޔާ އައްޔަންކުރައްވާފައިވަނީ އެގްރިކަލްޗާ އެންޑް އެނިމަލް ވެލްފެއާ މިނިސްޓްރީގެ މިނިސްޓަރު ކަމަށެވެ.