އެންވަޔަރަންމަންޓް މިނިސްޓްރީގެ ޑެޕިއުޓީ މިނިސްޓަރު މުހައްމަދު ރާގިބު އަހްމަދު، ރައީސުލް ޖުމްހޫރިއްޔާގެ އޮފީހަށް ރައްދުވާ ގޮތަށް ކޯޓަށް މައްސަލައެއް ހުށަހަޅައިފި އެވެ.
ކުރިން ގާޒީ ކަންވެސް ކުރައްވާފައިވާ ރާގިބު މައްސަލައެއް ހުށަހަޅާފައިވަނީ ހައިކޯޓަށެވެ.
ދުސްތޫރީ މައްސަލައެއްގެ ގޮތުގައި މި މައްސަލަ ހައިކޯޓަށް ހުށަހަޅާފައި އޮތް ނަމަވެސް މައްސަލައާ ގުޅޭ އެއްވެސް ތަފްސީލެއް ހައިކޯޓުން ނުދެ އެވެ.
ރައީސް އޮފީހަށް ރައްދުވާ ގޮތަށް ރާގިބު މައްސަލައެއް ކޯޓަށް ހުށަހަޅާފައި މިވަނީ ރައީސުލް ޖުމްހޫރިއްޔާ އައްޔަންކުރައްވާ ސިޔާސީ މަގާމު ތަކުގައި ތިއްބަވައިގެން، ދައުލަތާ ދެކޮޅަށް ވަކާލާތު ނުކުރެވޭނެ ކަމަށް، ރާގިބު ވަކާލާތު ކުރެއްވި މައްސަލައެއްގައި ހައިކޯޓުން ކަނޑައަޅާފައި ވަނިކޮށެވެ.
ހައިކޯޓުން މިގޮތަށް ކަނޑައެޅީ، ކުޑަކުއްޖަކާއި އެކު ޖިންސީ އަމަލެއް ހިންގިކަމުގެ ކުށް ސާބިތުވެފައިވާ މީހެއް ދިފާއު ކުރުމުގައި ވަކީލެއްގެ ގޮތުގައި ރާގިބު ކޯޓަށް ވަޑައިގެންނެވި މައްސަލައެއްގައެވެ.