ރައްޔިތުންގެ މަޖިލީހުގެ އަމީން ޢާންމުގެ މަގާމުގައި ހުންނެވި ފާތިމަތު ނިޔުޝާ އާއި ކައުންސެލް ޖެނެރަލްގެ މަގާމުގައި ހުންނެވި ފާތިމަތު ފިލްޒާ އަދި ސާޖެންޓް އެޓް އާމްސްގެ މަގާމުގައި ހުންނެވީ މޭޖަ (ރޓޑ) ތަލްހަތު ހަސަން އެ މަގާމުގައި ބަހައްޓަން މަޖިލީހުން މިއަދު ފާސްކޮށްފި އެވެ.
ނިޔުޝާ އާއި ފިލްޒާ އަދި ތަލްހަތު މަގާމުގައި ބަހައްޓަން ރައްޔިތުންގެ މަޖިލީހުން ފާސްކުރީ މިއަދު ނެގި ވޯޓުގަ އެވެ.
ނިޔުޝާ މަގާމުގައި ބަހައްޓަން ފެންނަ ކަމަށް 79 މެންބަރުން ވޯޓު ދެއްވިއިރު ފިލްޒާ މަގާމުގައި ބަހައްޓަން ފެންނަ ކަމަށް 80 މެންބަރުން އަދި ތަލްހަތު މަގާމުގައި ބަހައްޓަން ފެންނަ ކަމަށް 80 މެންބަރުން ވޯޓު ދެއްވި އެވެ.
މަޖިލީހުގެ ގަވާއިދު ބުނާ ގޮތުން އެ ގަވާއިދަށް އަމަލުކުރަން ފަށާތާ ދެ ދައުރު ހަމަވުމުގެ ކުރިން މަޖިލީހުން އެހެން ގޮތަކަށް ކަނޑަނާޅާހާ ހިނދަކު ހިނގަމުންދާ މަޖިލީހުގެ އަމީންއާންމާއި މަޖިލީހުގެ ކައުންސެލް ޖެނެރަލް އަދި ސާޖެންޓް އެޓް އާމްސްގެ މަގާމަށް މީހުން އައްޔަންކުރަންވާނެ ކަމަށް ބުނެފައިވެ އެވެ.