ރާއްޖޭގައި ހުންނަ އިންޑިއާ ސަފީރުގެ މަގާމަށް އާ ބޭފުޅަކު ހަމަަޖައްސައިފި އެވެ.
އެގޮތުން އިންޑިއާ އިން ރާއްޖެއަށް ކަނޑައެޅި އާ ސަފީރަކީ ގަންގަދަރަން ބާލާސުބްރަމާނިއަން އެވެ.
އޭނާ މިވަގުތު ހުންނެވީ އިންޑިއާ އިން ނައިޖީރިއާއަށް ކަނޑައަޅުއްވާފައި ހުންނަވާ ސަފީރުގެ މަގާމުގައެވެ.
އިންޑިއާގެ އެކްސްޓާނަލް އެފެއާޒް މިނިސްޓްރީން ބުނީ އޭނާ ވަރަށް އަވަހަށް ރާއްޖެ ވަޑައިގެން މަގާމުގެ މަސްއޫލިއްޔަތާ ހަވާލުވެވަޑައިގަންނަވާނެ ކަމަށެވެ.
ބާލާސުބްރަމާނިއަން އަކީ 1998 ވަނަ އަހަރުން ފެށިގެން ހާރިޖީ ދާއިރާގައި މަސައްކަތް ކުރައްވަމުން ގެންދަވާ ބޭފުޅެކެވެ. އެގޮތުން އޭނާ މީގެކުރިން ވަނީ ތައިލެންޑް އަދި ރަޝިއާގައި ހުންނަ އިންޑިއަން މިޝަންގެ ޑެޕިއުޓީ ޗީފްގެ މަގާމު ވެސް ފުރުއްވާފަ އެވެ.
ރާއްޖޭގައި މިވަގުތު ހުންނެވި މުނޫ މަހާވަރު އެ މަގާމާ ހަވާލުވެވަޑައިގަތީ ނޮވެމްބަރު 2021 ގައެވެ.