ފަތުހުﷲ ގުލެންގެ ތައުލީމީ ތަސައްވުރު: ރަން ޖީލު

ފަތުހުﷲ ގުލެން އަކީ ތުރުކީވިލާތުގެ ވަރުގަދަ ޝަހްސިއްޔަތެކެވެ. އޭނާ އުފަންވީ 1941 ވަނަ އަހަރު އެވެ. ގުލެން އަކީ ދީނީ އިލްމުވެރިއެއްގެ އިތުރުން ތައުލީމަށް އިންގިލާބެއް ގެނުވި ބޭފުޅެކެވެ. "ހިޒްމެޓް މޫވްމަންޓް" ނުވަތަ "ހިދުމަތު ހަރަކާތުގެ" ބާނީ އެވެ. ދުނިޔޭގެ އެތައް ގައުމެއްގައި 1000އަށް ވުރެ ގިނަ ސްކޫލު ގާއިމުކުރެއްވި އަދި އުނގެނުމުގެ މަންހަޖުގައި އިލްމާއި އެކުއެކީ އަހްލާގާއި ސުލޫކު ހިމެނުއްވި ތައުލީމީ ހާދިމެކެވެ.

ނަމަވެސް 2010 ވަނަ އަހަރު ތުރުކީވިލާތުގެ ވެރިކަންކުރާ ޕާޓީއާ އުފެދުނު ހިޔާލުތަފާތުވުމުގެ ތެރެއިން 2016 ވަނަ އަހަރު ބަޣާވާތެއް ކުރައްވަން އުޅުއްވިކަމުގެ ތުހުމަތާއެކު ހަޔާތުގެ ފަހުދުވަސްވަރު ގޫލެން ދިރިއުޅުއްވީ އަމިއްލަފުޅަށް އެމެރިކާއަށް އަރުވާލެވިގެން އެ ގައުމުގައެވެ.

ސިޔާސީ މި ލައްގަނޑުގެ ސަބަބުން ގުލެންގެ ނަމަށް ހުތުުރު ކަމެއް ލިބުނު ލިބުނަސް، (ގުލެންގެ ފަލްސަފާތަކަށް ތާއީދުކުރާ އެތައް ބައެއްގެ ސަބަބުން) ތައުލީމީ ހިދުމަތުގެ ހަރަކާތަށް ހުއްޓުމެއް ނައެވެ. ގުލެންގެ ތައުލީމީ ތަސައްވުރު ކަމުގައިވާ "ރަން ޖީލެއް" އުފެއްދުމުގައި އެހަރަކާތް ދިޔައީ ކުރިއަށެވެ.

ގުލެންގެ ތައުލީމީ ފަލްސަފާގައި ސައިންސާއި، އިންސާނާގެ ސުލޫކާއި އަދި އިސްލާމް ދީނަށް ވަރަށް ބޮޑު ސަމާލުކަމެއް ދީފައިވެ އެވެ. އެގޮތުން މިކަންކަމަކީ ތައުލީމާއި އުނގަންނައިދިނުމުގައި ވަކިކުރެވިގެންވާނޭ ކަންކަން ނޫން ކަމުގައި ބަލަ އެވެ. އަދި ތައުލީމީ ގޮތުން ކުރިއެރުމަކީ، އިލްމު ލިބިގަތުމުގެ އިތުރަށް އެކި ސަގާފަތްތަކުގައި ހުންނަ ތަފާތުތައް ދެނެގަނެ އިހްތިރާމާއެކު އެކީއުޅެން އެގުން ކަމުގައި ބަލަ އެވެ. މިސަބަބުތަކަށްޓަކައި ދުނިޔޭގެ އެތައް ގައުމަކުން ގޫލެންގެ ތައުލީމީ ފަލްސަފާއަށް ވަނީ ތާއީދު ލިބި އަދި ބަލައިގަނެފަ އެވެ. އެގޮތުން އެފްރިކާ، މެދު އިރުމަތި، ޔޫރަޕް، އެމެރިކާ، އަދި އޭޝިއާގެ އެތައް ގައުމުތަކެއްގައި ގުލެންގެ ތައުލީމީ ފަލްސަފާގެ މައްޗަށް ބިނާވެފައިވާ ސްކޫލުތައް ވެއެވެ.

ފަތުހުﷲ ގުލެންގެ ތައުލީމީ ފަލްސަފާގެ މައިގަނޑުތައް:

ދީނީ އަގީދާއާއި ސައިންސަކީ ހަމައެކަނި ގުޅުންތަކެއް ހުރި ދެ ކަމެއްގެ އިތުރުން އެކުއެކީގައިވާ ދެކަމެވެ. އެގޮތުން ގުލެން ގަބޫލުކުރައްވަނީ ފުރިހަމައަށް ސައިންސް އުނގަންނައިދެވޭނީ އިސްލާމް ދީނުގެ ހަމަތަކާއި އެކުގައިކަމާއި އަދި އިސްލާމް ދީން އުނގަންނައިދިނުމުގައި ސައިންސް ވަކި ނުކުރެވޭނެ ކަމެވެ.

މީގެ ސަބަބެއް ކަމަށް ގުލެން ބުނަނީ އިންސާނާގެ ދިރިއުޅުމުގައި ދީނާއި ސައިންސަކީ ވަކިނުކުރެވޭނެ ދެކަން ކަމުގައި ވީތީ އެވެ. މިވިސްނުމުގެ ބޭނުމަކީ ސައިންސްގެ ރޮނގުން އުނގެނުން ކުރިއަށް ގެންދިޔަ ކަމުގައިވިޔަސް، އިސްލާމްދީނުގެ އަހްލާގާއި ހަމަތަކާއި ސުލޫކުގައި ދެމިތިބުމެވެ.

ވަށާޖެހޭ އަދި ޖުމުލަ ތައުލީމެއް ފޯރުކޮށް ދިނުމުގައި ދަރިވަރުންގެ ބުއްދި (އިންޓަލެކްޓް) އާއި އެކުގައި އަހްލާގީ މިންގަނޑާއި ސުލޫކު ބައްޓަންކުރުމަށް ބާރު އަޅަންވާނެކަމަށް ގުލެންގެ ފަލްސަފާ ބުނެ އެވެ.

ގުލެންގެ ތަސައްވުރަކީ "ރަން ޖީލެއް" އުފެއްދުން ކަމުގައިވީއިރު ކޮންމެ މީހެއްގެ ކިބައިގައި އަމިއްލައަށް ގަބޫލޫކުރާ އަހްލާގީ މިންގަނޑަކާއި، ތަފާތު ފިކުރު ތަހައްމަލުކުރުމުގެ ގާބިލްކަމާއި އަދި ކުރިއަށް ދެކޭ ލަނޑުދަނޑިއެއް އޮންނާން ވާނެ އެވެ. މިކަމުގެ މައްޗަށް ތަރުބިއްޔަތު ކުރެވޭ ދަރިވަރުން ވާނީ އިލްމީގޮތުން މޮޅުވުމުގެ އިތުރުން ނަފްސާނީ ގޮތުން ވަރުގަދަ އަދި އަހްލާގީ ޝަހްސެއްގެ ވެރި ދަރިވަރުން ތަކަކަށެވެ.

ގުލެންގެ ތައުލީމީ ފަލްސަފާގެ އެންމެ މުހިއްމު އެއް މައިގަނޑަކީ، ތިމާއަށްވުރެ އަނެކާއަށް ހެޔޮއެދުމާއި، އިޖުތިމާއީ ގޮތުން އެކި ކަންކަމުގައި ހިދުމަތްކުރުމުގައި ދެމިހުރުމެވެ. މިގޮތުން ތައުލީމަކީ މުޖުތަމައަށް ހިދުމަތްކުރުންކަމާއި އަދި މުދައްރިސުންނަކީ އަބަދުވެސް މުޖުތަމައުގެ ސުލޫކީ މިންގަނޑު ދައްކުވައިދޭ ރޯލް މޮޑެލުން ކަމުގައި ގުލެން ދެކެ އެވެ.

މިފަލްސަފާގެ މައްޗަށް އުފެއްދި ސްކޫލުތަކުގައި، މުޖުތަމައުއާ ބައިވެރިވެގެން ހިންގޭ އިޖުތިމާއީ ހަރަކާތްތަކަށް ހާއްސަ ސަމާލުކަމެއް ދެވެ އެވެ.

އެކި ސަގާފަތްތަކުގައި ހުންނަ ތަފާތުތައް ދެނެގަނެ އެކި ފިކުރުގެ މީހުންނާއެކު މަޝްވަރާކުރުމުގެ ގާބިލްކަމާއި ފިކުރީ ތަފާތުތައް ތަހައްމަލުކުރުމަކީ މުޖުތަމައުގެ އަމާންކަމާއި ސުލްހަވެރިކަމަށް ނުހަނު ބޭނުތެރި ކަންތައްތަކެއް ކަމުގައި ގުލެން ދެކުނެވެ. މިކަންކަމަކީ އިސްލާމް ދީނުގައި ވެސް ނުހަނު ބާރުއަޅާފައި ހުރި ކަންކަމެވެ. އެގޮތުން ގުލެން-ސްކޫލުތަކުގައި، ތަފާތު ސަގާފަތްތަކުންނާއި އެކިކަންކޮޅުތަކުން އެކިފިކުރުގެ ދަރިވަރުން އެކުއެކީގައި އުނގެނުމުގައި ޝާމިލުވެ އެވެ.

ގުލެން ދެކުނު ގޮތުގައި ހެޔޮ އަހްލާގަކީ ހަމައެކަނި ކިޔައިދީގެން ބައްޓަންކުރެވޭނެ ކަމެއް ނޫނެވެ. އަދި އަދަބު ދީގެން ނުވަތަ ބިރު އިހްސާސް ކުރުވައިގެން ގެނެވޭ އަހްލާގީ ބަދަލަކީ، އަމިއްލައަށް ގަބޫލުކުރެވިގެން ގެނެވޭ ބަދަލުތަކަކަށް ނުވުމުން އެއީ ތިމާގެ އުޅުމުގައި އަށަގެންނުވޭ ކަންކަމެއް ނޫނެވެ.

ހަގީގީ އަހްލާގީ ތަރުބިއްޔަތަކީ ތިމާއަށް ފެނިގެން އަދި ގަބޫލުކުރެވިގެން އަށަގެންނުވޭނެ ކަމެއްކަމުން، ގުލެން-ސްކޫލުތަކުގައި މުދައްރިސުންނަކީ އަހްލާގީ ރޯލް މޮޑެލުންނަށް ނުވަތަ ދަރިވަރުންނަށް މިސާލަކަށް ވުމަށް ބާރު އަޅަ އެވެ. އެގޮތުން މި ސްކޫލުތަކުން ނިކުންނަ ދަރިވަރުންނަކީ އަމިއްލަ ވިސްނުމާއި އިހްތިޔާރުގައި އަހްލާގާއި ސުލޫކީ މިންގަނޑު ބައްޓަންކުރެވިފައިވާ ދަރިވަރުންނެވެ.

މިއަހަރުގެ ތެރޭގައި ނިޔާވި ފަތުހުﷲ ގުލެންގެ ތައުލީމީ ފަލްސަފާއަކީ އެތައް އިބުރަތްތަކެއް އޭގެއިން ލިބޭ ފަލްސަފާ އެކެވެ. ގުލެން-ސްކޫލުތަކުގައި އެތައް އަހަރެއް ވަންދެން ހިންގާ ޓެސްޓް ކުރެވި އަދި މިއަދުވެސް ފެންނާންހުރި ހަގީގަތެކެވެ.

ދިވެހިރާއްޖޭގެ ތައުލީމީ އާ މަންހަޖުގައިވެސް މިފަލްސަފާގެ މައިގަނޑުތައް ކޮންމެވެސް ވަރަކަށް ފެންނާން އެބަހުއްޓެވެ. ނަމަވެސް ސްކޫލްތައް ހިނގަނީ އެ މައިގަނޑުތަކުގެ މައްޗަށް ކަމަށް ދަންނަވަން ދައްޗެވެ. ވީމާ އާ މަންހަޖަށް އެތައް އަހަރެއް ވެގެންދިޔައިރުވެސް، އެ މަންހަޖާ އެއްގޮތަށް ސްކޫލުތަކުގައި އުނގަންނައިދިނުން ކުރިއަށް ނުދަނީ ކީއްވެގެންތޯ ދިރާސާކުރެވި ބަދަލުތަކެއް ގެންނާން ޖެހެ އެވެ.