އާ އަމާޒެއް، އަންނަ އަހަރަށް 2.4 މިލިއަން ފަތުރުވެރިން

އަންނަ އަހަރު ރާއްޖެއަށް 2.4 މިލިއަން ފަތުރުވެރިން ގެންނަން އަމާޒު ހިފައިފި އެވެ.

ރާއްޖެއަށް އަންނަ އަހަރު 2.4 މިލިއަން ފަތުރުވެރިން ގެންނަން އަމާޒު ކަނޑައަޅާފައިވާކަން ހާމަކުރެއްވީ ދައުލަތުގެ މީޑިއާއަށް ދެއްވި އިންޓަވިއުއެއްގައި ޓޫރިޒަމް މިނިސްޓަރު އިބްރާހީމް ފައިސަލް އެވެ.

މިނިސްޓަރު ފައިސަލް މިހެން ވިދާޅުވި އިރު އަންނަ އަހަރަށް ލަފާކުރާ ދައުލަތުގެ ބަޖެޓުގައި އަންނަ އަހަރު 2.2 މިލިއަން ފަތުރުވެރިން ޒިޔާރަތްކުރާނެ ކަމަށް ވަނީ އަންދާޒާކޮށްފަ އެވެ.

ފައިސަލް ވިދާޅުވީ މިހާރު ކުރެވޭ މަސައްކަތްތަކާއެކު އަންނަ އަހަރަކީ ރާއްޖޭގެ ފަތުރުވެރިކަމުގައި ފާގަތި އަހަރަކަށްވާނެ ކަމަށެވެ.

ފަތުރުވެރިކަމުގެ ބޮޑެތި މާކެޓްތަކުން ޒިޔާރަތްކުރާ ފަތުރުވެރިންގެ އަދަދު އިތުރުވެފައިވާކަން ފާހަގަކުރައްވާ މިނިސްޓަރު ފައިސަލް ވިދާޅުވީ އާ މާކެޓްތަކުގައި ފަތުރުވެރިކަން އިސްތިހާރުކޮށް އަންނަ އަހަރު ފަތުރުވެރިންގެ އަދަދު 2.4 މިލިއަނަށް އެރުވުމަކީ އަމާޒެއް ކަމަށެވެ.

ރާއްޖެއަށް މި އަހަރު ދެ މިލިއަން ފަތުރުވެރިން ޒިޔާރަތްކުރާނެ ކަމަށް އަންދާޒާކޮށްފައިވާއިރު މިހާތަނަށް 1.8 މިލިއަން ފަތުރުވެރިން ރާއްޖެ އައިސްފައިވެ އެވެ.