ރާއްޖެއަށް މި އަހަރު ދެ މިލިއަން ފަތުރުވެރިން ގެނައުމަށް ސަރުކާރުން ހިފާފައިވާ އަމާޒު ލަސްވެގެން ޑިސެމްބަރު 25ގައި ހާސިލުކުރެވޭނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިން ޑެސްޓިނޭޝަން އެވޯޑް" ރާއްޖެއިން ޖެހިޖެހިގެން ފަސް ވަނަ ފަހަރަށް ހޯދުން ފާހަގަކުރުމަށް ބޭއްވި ހަފްލާގައި ނޫސްވެރިންނަށް މައުލޫމާތު ދެއްވަމުން މިނިސްޓަރު ފައިސަލް ވިދާޅުވީ ދެ މިލިއަން ފަތުރުވެރިންގެ އަމާޒު މި އަހަރު ހާސިލުވާނެ ކަމަށެވެ.
"މިހާރު އެރައިވަލްސް ހުރި ވަރަށް ބަލާއިރު އަޅުގަނޑުމެންނަށް ޑިސެމްބަރު މަހުގެ 25 އެންމެ ލަސްވެގެން ދެ މިލިޔަން ހަމަކުރެވޭނެ،" މިނިސްޓަރު ފައިސަލް ވިދާޅުވި އެވެ.
ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މިއަހަރުގެ މިހާތަނަށް 1.8 މިލިއަން ފަތުރުވެރިން ޒިޔާރަތްކޮށްފައިވެ އެވެ.
ފާއިތުވި 2023 ވަނަ އަހަރު ރާއްޖެއަށް 1.8 މިލިއަން ވަނަ ފަތުރުވެރިޔާ ޒިޔާރަތްކުރީ ޑިސެމްބަރު 20 ވަނަ ދުވަހު އެވެ.
ރާއްޖެއަށް މިމަހުގެ މިހާތަނަށް އެވަރެޖްކޮށް ދުވާލަކު 5،799 ފަތުރުވެރިން ޒިޔާރަތްކުރެ އެވެ.