ކްރޫޒު ލައިނާތަކަށް ހާއްސަ ޖެޓީތަކެއް ރާއްޖޭގެ ތިން ސަރަހައްދެއްގައި ތަރައްގީކުރުމުގެ މަސައްކަތް ކުރަމުންދާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
ދައުލަތުގެ މީޑިއާގައި ވާހަކަ ދައްކަވަމުން ޓޫރިޒަމް މިނިސްޓަރު ފައިސަލް ވިދާޅުވީ ރާއްޖެ އަންނަ ކްރޫޒު ލައިނާތައް އިތުރުކުރުމަށް ގިނަ މަސައްކަތްތަކެއް ކުރަން ރާވާފައިވާ ކަމަށެވެ.
ރާއްޖޭގައި ކްރޫޒު ލައިނާތަކަށް ހުރި ދަތިތަކަށް ހޯދައިދިން ލުއިތަކާއެކު މިދިޔަ އަހަރާއި މި އަހަރު 600 އަށްވުރެ ގިނަ ފަތުރުވެރިން ކްރޫޒް ލައިނާތަކުގައި ރާއްޖެ އައިސްފައިވާކަން މިނިސްޓަރު ފައިސަލް ފާހަގަކުރެއްވި އެވެ.
މިނިސްޓަރު ފައިސަލް ވިދާޅުވީ ކްރޫޒު ލައިނާތަކަށް ހާއްސަ ޖެޓީތައް ނުވަތަ ބަނދަރުތައް ތަރައްގީކުރުމަށް ބައެއް ސަރަހައްދުތައް ދިރާސާކުރަމުންދާ ކަމަށެވެ.
"އައްޑޫ ކަހަލަ ލާމު އަތޮޅު ކަހަލަ ތިން ސަރަހައްދެއްގައި، މިދަނީ ބަލާ ދިރާސާކުރަމުން،" ފައިސަލް ވިދާޅުވި އެވެ.
ރާއްޖެއަށް މިދިޔަ ހަފުތާގައިވެސް ކްރޫޒްލައިނާއެއް ޒިޔާރަތްކުރި އެވެ. އެގޮތުން ކްރިސްޓަލް ސިމްފޮނީ ނަމަކަށް ކިޔާ މި ކުރޫޒް ޝިޕް 212 ފަތުރުވެރިން މާލެ އައިސްފައިވެ އެވެ.