ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ ނިކަމެތީންނަށް އެހީތެރިވުމަށް އދ އަށް އަންނަ އަހަރު 47 ބިލިއަން އެމެރިކާ ޑޮލަރު ބޭނުންވާ ކަމަށް އެޖަމާއަތުން ހާމަކޮށްފި އެވެ.
އދގެ އިންސާނީ އެހީގެ ކަންކަން ވިލަރެސް ކުރާ އޮފީސް (އޯސީއެޗްއޭ)ގެ ވެރިޔާ ޓޮމް ފްލެޗާ ވިދާޅުވީ މި ވަގުތު ދުނިޔޭގެ އެކި ގައުމުތަކުގައި 190 މިލިއަނަށް ވުރެ ގިނަ މީހުން ކާބޯތަކެއްޗާއި އިންސާނީ އެހީއަށް ބޭނުންވެފައިވާ ކަމަށެވެ.
ފްލެޗާ ވިދާޅުވީ 32 ގައުމެއްގައި ހާލުގައި ޖެހިފައިވާ ނިކަމެތީންނަށް ކާބޯތަކެއްޗާއި އިންސާނީ އެހީ ފޯރުކޮށްދިނުމަށް އޭނާގެ އޮފީހުން އަމާޒު ހިފާފައިވާ ކަމަށެވެ.
އެހީ ފޯރުކޮށްދިނުމުގައި އެންމެ އިސްކަމެއްދޭ ގައުމުތަކުގެ ތެރޭގައި ސޫދާން، ސޫރިއާ، ފަލަސްތީނުގެ ޣައްޒާ އަދި ޔޫކްރެއިން ހިމެނެ އެވެ.
"ދުނިޔެ އެދަނީ ރޯވެ އަނދަމުން. އަލިފާންގަނޑު ނިއްވައިލެވޭނެ ހަމައެކަނި ގޮތަކީ އެހީވުން. އެންމެ ބޮޑަށް ހާލުގައި ޖެހިފައި ތިބި ނިކަމެތީން ތިބި ގައުމުތަކާ އެކު ގުޅުންތައް އަޅުގަނޑުމެން ހަރުދަނާ ކުރަންޖެހޭ،" ފްލެޗާ ވިދާޅުވި އެވެ.
މިއަހަރަށް ބޭނުންވާ 46 ބިލިއަން ޑޮލަރުގެ އެހީގެ ތެރެއިން މިހާތަނަށް ލިބިފައިވަނީ އެންމެ 43 އިންސައްތަ ކަމަށާއި، އެމެރިކާއިން ކުރިން ދެމުން އައި އެހީގެ ބޮޑު އިންސައްތައެއް ކަނޑާލާފައިވާ ކަމަށްވެސް ފްލެޗާގެ ވާހަކައިގައި ވަނީ ފާހަގަކުރައްވާފަ އެވެެ.